El Principáu cierra les aules y pide que nun haya reagrupamientos masivos

El Principáu cierra les aules y pide que nun haya reagrupamientos masivos
13 marzu 13:03 2020 Imprimir

El Principáu vieno acabante pesllar les aules y pide que nun haya reagrupamientos masivos nes cais. Suspéndense asina les clases presenciales en toles etapes educatives, dende’l 0 a 3 a la Universidá, pero habilitaránse plataformes ‘online’ pa poer siguir les actividaeds docentes.

A partir de güei y siquier hasta’l 27 de marzu, yá que ye un plazu «revisable», tolos centros educativos d’Asturies van suspender les clases presenciales, magar van seguir desenvolviéndose a distancia les actividaes docentes, pero siempres de refuerzu, ensin avanzar materia. Tratase de la midida más drástica adoptada hasta’l momentu pol Principáu para tratar de frenar, o siquier ralentizar, la espansión del coronavirus. Nun va ser la única yá que, tal que avanzó ayeri’l presidente, Adrián Barbón, «nun tamos ante una tema menor» y al Executivu autonómicu nun lu tremecerá la mano» p’adoptar toles midíes que sían necesaries en coordinación col ministeriu de Sanidá y los profesionales pa «ganar la batalla» al virus. «Nunca vivimos una situación similar. Nun ye chancia», manifestó.

El retu del Principáu ye torgar la crecedera esponencial de casos pa evitar el colapsu sanitariu pa lo que’l Presidenrte asturianu apaeció esti xueves flanqueáu pol conseyeru de Salú, Pablo Fernández, y pola vocera del Gobiernu, Melania Álvarez, Barbón fixo repitíos llamamientos a la responsabilidá» de la población yá que, alvirtió, ensin la so collaboración pa controlar la espansión «nun hai sistema de sanidá nel mundu que lu pueda asumir».

La decisión en relación a la comunidá educativa foi adoptada de forma gradiada -el pasáu martes cerráronse cinco colexos, ayeri pela mañana ampliábase la midida a tolos centros d’Uviéu y a la Universidá y, finalmente, decidió aplicásela ensin nengún tipu d’esceición en tol territoriu- hasta afectar al total de 131.300 alumnos de toles etapes, dende’l 0 a 3 hasta la Universidá. Una cifra a la qu’habría qu’añedir los alumnos de les guarderíes privaes, igualmente afectaes.

  Categories: