El Principáu autoriza amenorgar el 50% les cuotes de les escueles de 0 a 3

El Principáu autoriza amenorgar el 50% les cuotes de les escueles de 0 a 3
06 xunetu 08:46 2018 Imprimir

L’Executivu rexonal asturianu autorizó esta selmana en Conseyu de Gobiernu  un amenorgamientu del 50% de les cuotes de les escueles de 0 a 3.

El Principáu vieno acabante d’autorizar la firma de les adendes a los convenios de collaboración suscritos colos 38 conceyos que xestionen les 65 escueles de primer ciclu d’Educación Infantil del Principáu. Por aciu estes adendas modifícase’l sistema de bonificaciones y precios públicos que tienen d’abonar les families usuaries d’esta rede de centros, que se van beneficiar d’una rebaxa del 50% al respective de les cuotes que pagaben hasta agora.

El Principáu aumenta’l financiamientu d’estes escueles en 2,1 millones pal próximu cursu, cola fin de compensar a los conceyos pol amenorgamientu de los ingresos que van percibir. En total, l’Executivu preve destinar a estos centros nel períodu escolar 2018-2019 cerca de 13,5 millones, anque la cifra final va depender del alumnáu matriculáu, les unidaes y les plantiyes definitives.

El Gobiernu asturianu quixo destacar esta selmana que con esta midida, l’Alministración autonómica “establez los precios públicos más baxos de toles comunidaes que cunten con escueles infantiles públiques de característiques y condiciones homologables a les del Principáu”.

Una vegada efectuada l’amenorgamientu del 50%, pola xornada completa d’ocho hores los padres van pagar cero euros, 59,85 euros, 80,88 euros, 121,32 euros o 161,76 euros, en función de la renta familiar mensual, n’aplicando bonificaciones del 100%, el 63%, el 50%, el 25% o’l 0%. Ese mesmu porcentaxe que s’aplica a les tarifes de la media xornada, de cuatro hores, que los sos precios van de los cero a los 29,93 euros, 40,44 euros, 60,66 euros o 80,88 euros.

N’atención al númberu de miembros de la unidá familiar, van aplicase otres bonificaciones adicionales: la unidá familiar de cuatro fíos o más va tener na cuota mensual una bonificación añedida de 30 euros per fíu, escluyíos los dos primeros, nel casu de xornada completa, y de 15 euros si se trata de media xornada, siempres que la so renta nun supere en seis vegaes el salariu mínimu interprofesional. Si varios fíos asisten al mesmu centru, va aplicase un descuentu adicional del 20% de la cuota.

Los trenta y ocho conceyos que xestionen les escueles de primer ciclu d’Educación Infantil son Ayer, Avilés, Bimenes, Cangas, Cangues d’Onís, Carreño, Castrillón, Castropol, Coaña, Colunga, Corvera, Cuideiru, El Franco, Xixón, Gozón, Grau, Llangréu, Llaviana, L.lena, Llanera, Llanes, Mieres, Morcín, Nava, Navia, Noreña, Uviéu, Pravia, Ribesella, Salas, Samartín del Rei Aurelio, Siero, Taramundi, Teberga, Tinéu, Valdés, A Veiga y Villaviciosa.

  Categories: