Portada Comunicación El Principáu activó’l protocolu por episodios de contaminación n’Uviéu

El Principáu activó’l protocolu por episodios de contaminación n’Uviéu

by redacción asturnews

La Conseyería d’Infraestructures, Mediu Ambiente y Cambéu Climáticu activó nel caberu día del añu’l Protocolu d’Actuación n’episodios de contaminación del aire del Principáu d’Asturies na zona d’Uviéu, nel so nivel 0 (preventivu), al persistir trés díes siguíos los niveles altos de partícules en suspensión na atmósfera.

El dispositivu actívase nel so nivel 0 cuando la concentración de partícules na atmósfera ye superior a 25 microgramos por metru cúbicu (µg/m3) de PM2,5 (partícules de diámetru inferior a 2,4 micres) o de 45 µg/m3 pa les PM10 (con diámetru inferior a 10 micres) a lo llargo de trés díes polo menos nuna estación de la zona.

En concreto, sigún el comunicáu del Principáu, “foron les estaciones de la rede de control de la calidá del aire allugaes en Llugones y na zona norte d’Uviéu (xunto al palaciu de deportes) les que detectaron valores percima de los topes previstos pa l’activación del protocolu de les denominaes partícules PM2,5 (aquelles que tienen un diámetru inferior a 2,5 micres). Al respective de los otros dos contaminantes regulaos pol protocolu, les partícules PM10 (con diámetru inferior a 10 micres) tamién vienen dando valores más altos de lo habitual nos últimos díes y el dióxidu de nitróxenu nun presenta problemes”.

Tamién te podria gustar