El primer gran exame universal d’español empieza l’añu que vien

El Serviciu Internacional d’Evaluación de la Llingua Española (SIELE) va certificar el grau de conocencia del castellán de cualesquier estudiante per medios electrónicos, al traviés d’internet, con un plazu de validez de dos años.

L’exame panhispánicu ta impulsáu pol Institutu Cervantes, la Universidá de Salamanca y l’Universidá Nacional Autónoma de México. Ye similar a pruebes tan internacionales como’l TOEFL, el test qu’evalúa l’inglés estadounidense como llingua estranxera.

Na see principal del Cervantes, allugada nel centru de Madrid, formalizóse esti xueves el conveniu de les trés instituciones mentaes con Telefónica, que va ser la encargada del desenvolvimientu tecnolóxicu y la comercialización del serviciu.

El modelu diríxese tantu a estudiantes d’español (21 millones en tol mundu) como a falantes nativos. Cualesquier aspirante va poder llograr un máximu de 1.000 puntos. Nun habrá aprobaos nin suspensos. Cola resultancia estableceranse equivalencies col marcu européu de referencia (seis niveles, dende básicu a maestría). Esta evaluación va constar de cuatro partes: comprensión de llectura, comprensión auditiva, espresión ya interacción escrites y espresión ya interacción orales.

L’aspirante va poder realizar l’exame completu, col que va llograr un certificáu, o encarar una o delles de los cuatro pruebes de forma independiente. Nesti últimu casu, va recibir solo un informe de nivel.

Los organizadores preven consiguir hasta 300.000 candidatos nuna primer fase y llegar a 750.000 esaminaos nun plazu de cinco año.