Portada Educación El presupuestu pa beques aumenta nel Estáu en 40 millones

El presupuestu pa beques aumenta nel Estáu en 40 millones

by redacción asturnews

El presupuestu pa beques aumenta nel Estáu en 40 millones, depués de que’ll Gobiernu aprobara les ayudes pal próximu cursu. N’Asturies, más de 18.000 estudiantes reciben dineru del ministeriu.

El Gobiernu aprobó, tal que taba previstu y magar la oposición de dellos sindicatos y asociaciones de families qu’amosaron el so desalcuerdu nel senu del Conseyu Escolar del Estáu, el decretu que regula les beques al estudiu para’l próximu cursu. En total, daqué más de 1.500 millones d’euros, lo que supon 40 más que l’añu pasáu. Al marxe d’eso nun hai mayores cambeos respecto al sistema anterior, el qu’aprobó’l exministro José Ignacio Wert, y de ende’l malestar de dellos sectores. Sí espérase que les beques lleguen a 17.000 alumnos más, pero non por un cambéu nes normes de les ayudes, sinón por unu cambéu de los Presupuestos del Estáu de 2018 qu’aumentaba les deducciones fiscales para los ingresos del trabayu, lo que va faer posible que dellos alumnos puedan recibir mayores cuantíes esta vegada o qu’otros, que nunca tuvieren derechu hasta agora, sí puedan optar a elles. D’ende la necesidá d’aumentar el presupuestu.

El Gobiernu calcula que n’España reciben estes ayudes unos 800.000 estudiantes al añu. Nel casu d’Asturies, más de 18.000 mozos tienen una beca del Ministeriu d’Educación, según les últimes cifres oficiales, del cursu 2016-2017. Xuntu coles ayudes del Principáu, más de 37.000 estudiantes precisen de collaboración de les alministraciones para poder siguir cola so formación.

Otra manera, el decretu caltien una cuantía fixa amestada a la renta familiar del solicitante, con otra parte venceyada al llugar de residencia. Amás, hai una cantidá que depende’l rendimientu académicu del alumnu. Y esta ye una de les cuestiones que más criticada foi per parte de sindicatos y families, xuntu cola tardanza nes convocatories y los pagos. Porque hai un parte de l’ayuda que s’ingresa ente xineru y mayu, cuando’l cursu ta rematando.

Per otru llau, caltiense la situación coles estudiantes que fueron víctimes de violencia de xéneru, a les que nun s’esixen dellos requisitos académicos como la carga lectiva superada nel cursu anterior, la llende del númberu d’años como becariu o la esixencia de superar un determináu porcentaxe de creitos. Ye’l segundu añu que s’apliquen estes midíes.

La cuestión ye que’l PSOE comprometiérase a modificar la regulación de les beques, que na so forma actual data del añu 2013, daqué qu’enagora non se fixo. Dende la comunidá educativa solicitárase aumentar la cuantía fixa, modificar los estragales de renta y los plazos de tramitación. La ministra d’Educación y Formación Profesional Isabel Celáa, defendió que l’aprobación anguaño «llega casi un mes antes, con ello damos respuesta a una reivindicación largamente sostenida nel tiempu». Y aseguró que se convocó l’Observatoriu de Beques, Ayudes al Estudiu y Rendimientu Académicu pa estudiar l’estáu de la cuestión y faer llegar les sos propuestes pal cambéu del actual modelu de beques al estudiu.

Les principales quexes tán rellacionaes col fechu de qu’haya xuna parte variable que dependa de les resultancies académiques. Al paecer, esos axustes introducíos por Wert fixeron baxar non solo’l númberu de becaos sinón tamién les cuantíes medies que reciben.

Tamién te podria gustar