El presupuestu pa 2014 cada vez más lloñe

El Conseyu Políticu d’IX alcordaba esti día presentar una enmienda a la totalidá al presupuestu d’Asturies, por 89 votos a favor, nengunu en contra y una astención, colo que la formación refugaba la propuesta del PSOE por entender que nun respuende a les necesidaes d’Asturies en reactivación económica y protección social y dexaba la puerte abierta a la prórroga presupuestaria. El coordinador d’IX asegura tender la mano a la negociación d’alcuerdu pero diz que pa eso’l presidente “tien que salir de la cueva”.

El Conseyu Políticu d’IX alcordó ayeri llunes la presentación d’una enmienda a la totalidá al presupuestu d’Asturies. Les razones pal refugu a les cuentes presentaes pol Executivu socialista pa 2014 son, tantu la insuficiencia de les previsiones del Gobiernu p’atender les necesidaes reales d’Asturies en reactivación económica, protección social, mediu rural y universidá, como la negativa del PSOE a incorporar les propuesta plantegaes por Izquierda Xunida n’ingresos y gastos.

Sigún se diz na web d’IX, “el Conseyu Políticu, por 89 votos a favor, nengunu en contra y una astención, tornó sofitar un presupuestu en llínea coles polítiques económiques de Mariano Rajoy, tal que el mesmu delegáu del Gobiernu, Gabino de Lorenzo, resumió pa pidir al so partíu que sofitara la propuesta de Javier Fernández. La falta de voluntá real del Gobiernu de Javier Fernández pa llegar a un alcuerdu quedó afigurada nel proyectu finalmente presentáu, y nel que nun se recueyen les propuestes d’IX pa executar polítiques actives contra la crisis y de protección a los más cutíos pola mesma”.

De los 112 millones de medría que se plantegaben per parte d’IX en materia de gastu, el presupuestu socialista namái incorporó 7,7 millones d’euros y de esa mesma cifra, n’ingresu, solo apaecen daqué menos de 10 millones d’euros. Na decisión del Conseyu Políticu d’IX “pesaron los incumplimientos per parte del Gobiernu socialista na execución de los presupuestos de 2013, onde, en planes d’emplegu, a 15 de noviembre, siguí ensin invertise’l 75% del presupuestu, o los más de 12 meses de demoranza pala percepción del salariu social, onde 6.000 persones atópense entá en fase de tramitación”.

IX va caltener les sos propuestes como referencia pa la tramitación de creitos estraordinarios, siguiendo cola mano tendida al Gobiernu p’axustar “un marcu presupuestariu y políticu que respuenda a les necesidaes reales de la sociedá asturiana”.