El presupuestu de la Universidá prorrogase al nun tar constituyíu’l so nuevu Conseyu Social

El presupuestu de la Universidá prorrogase al nun tar constituyíu’l so nuevu Conseyu Social
07 xineru 17:47 2020 Imprimir

La Universidá d’Uviéu va empezar l’añu col so presupuestu pa 2020 prorrogáu al nun podese constituyir, a 31 d’avientu de 2019, el nuevu Conseyu Social de la institución académica, según publicó esti día’l BOPA.

El Conseyu de Gobiernu de la universidá asturiana aprobó’l 20 d’avientu unes cuentes que xuben a 211.048.000 euros, un 1,3% más qu’en 2019, ya inclúin una partida pa gastos de personal de 142.373.970 euros, lo que representa un aumentu de 806.684 euros respecto al pasáu añu. Nesa mesma fecha, el BOPA publicó’l nomamientu del empresariu asturmexicano Juan Antonio Pérez Simón como nuevu presidente del Conseyu Social, que fuera alcordáu’l 7 d’avientu pol Conseyu de Gobiernu. Con él cerraba’l procesu de renovación del órganu universitariu tocantes a los representantes escoyíos pol Conseyu de Gobiernu y pola Xunta Xeneral.

Sicasí, inda nun s’axuntó’l plenu del Conseyu Social pa proceder al relevu del presidente -cargu nel que Pérez Simón sustitúi al tamién empresariu Ladislao Azcona- nin de los nuevos vocales, un trámite al que va siguir la designación pola presidencia de la persona que va asumir les funciones de la secretaría. Cabo recordar que, amás de promover la collaboración social nel financiamientu de la universidá, ente les sos funciones tán aprobar el presupuestu y supervisar l’actividá económica de la institución.

  Categories: