El presupuestu de Cultura n’Uviéu pa 2017 xube a más de 10 millones

El presupuestu de Cultura n’Uviéu pa 2017 xube a más de 10 millones
02 marzu 09:02 2017 Imprimir

La área de Cultura del Ayutamientu d’Uviéu, empobinada por Roberto Sánchez Ramos, va ecentrase na conmemoración del 125 aniversariu del Teatru Campoamor y nel Camín Primitivu nun añu nel que’l presupuestu de Cultura n’Uviéu va ser de más de 10 millones.

El presidente de la Fundación Municipal de Cultura, Roberto Sánchez Ramos, desplicó nos caberes díes de febreru les cuentes del so departamentu pal presente exerciciu, que xuben a 1.895.900 euros. A esta cifra hai qu’añedir, según esplicó Sánchez Ramos, otros 50.000 euros comprometíos por entidaes privaes pa celebrar el 125 aniversariu del Teatru Campoamor para lo que’l Conceyu acutó 105.000 euros. Amás, el conceyal anunció la instalación d’una placa homenaxe a Clarín nel Campoamor por cuenta de esta efeméride.

El ciclu de Conciertos y Xornaes de Pianu cunta con un presupuestu de 1,8 millones d’euros pa 2017  ente que’l conveniu con Uviéu Filarmonía va suponer una inversión de 2,7 millones d’euros. El Cine na Cai puestu en marcha con gran ésitu mientres los meses de branu de 2016 va llevase 34.500 euros del presupuestu global y el ciclu Primavera Barroca, 51.000 euros.

La collaboración con Ópera d’Uviéu va tener un costu de 475.000 euros, la Banda de Música Ciudá d’Uviéu va cuntar con una partida de 604.000 euros  ente que’l presupuestu pa la Banda de Gaites Ciudad d’Uviéu va xubir a 292.000 euros.

Per otra parte, la Fundación Municipal de Cultura va destinar 50.000 euros a la convocatoria del premiu lliterariu Tigre Juan. No que fai a partíes destinaes a fiestes populares, de barriu y de la zona rural, la partida xube a 140.000 ente que se acutar otros 155.000 euros a subvencionar actividaes culturales a propuesta de colectivos y asociaciones.

  Categories: