Portada Política El Presupuestu de 2013 acabará con gran parte de les ayudes a la normalización del asturianu

El Presupuestu de 2013 acabará con gran parte de les ayudes a la normalización del asturianu

by asturnet

El proyectu de presupuestu que pautaron FSA-PSOE, Izquierda Xunida y UPyD pal añu 2013 va dedicar 1.706.735 euros a la promoción del asturianu, lo que supón una baxa, una cifra que supón una baxa del 14%. La Conseyera Ana González anunció que van eliminase les ayudes p’asociaciones, empreses y p’actividaes cinematográfiques qu’usen l’asturianu, anque dixo que les de medios de comunicación y música van medrar. Esto supón que los pocos pasos daos na normalización del asturianu nel ámbitu de la empresa y l’asociacionismu podríen vese desaniciaos en pocu tiempu.

El grupu parllamentariu de Foru Asturies respondió a esta baxada cola intervención del diputáu Manuel Peña na Xunta Xeneral del Principáu nel turnu d’afitamientu de posiciones na comparecencia de la Conseyera d’Educación, Cultura y Deporte, Ana González:

Tocantes a la promoción y normalización social de la Llingua asturiana, l’amenorgamientu del 36,27 por ciento en comparanza colos actuales presupuestos prorrogaos ye un duru golpetazu pa la promoción del asturianu.

El so problema cola llingua asturiana ye que nun saben qué facer con ella. Nun tienen una idea clara sobre ónde quieren vela asitiada nos próximos años. Ye más; nin siquiera fueron a pensar n’ello. Y, agora, esta falta de previsión ta enseñándose dramática.

La so política, nestos años anteriores, foi siempre la del mal menor. Siempre-yos repunó esta cuestión. Siempre-y tuvieron munchu mieu al asturianu. Mieu a la normalización. Mieu al espardimientu. Mieu a la promoción. Mieu a les implicaciones alministratives de sentar cualquier precedente. Mieu al costu económicu futuru. Mieu a les implicaciones polítiques. Mieu al agraviu comparativu. Mieu, a última hora, a que tou esta tema se-yos escapare de les manes y quedare fuera de control; fuera del so control. Y por eso nunca s’atrevieron a tratar con grandor, con ambición, el futuru d’esti patrimoniu que nos pertenez a tolos asturianos.

Nos sos munchos años de gobiernu ustedes nunca fixeron nada por presentar una llei que desenvolviera l’artículu 4 del nuesu estatutu. Tuvieron que ser otros los que tomaren la iniciativa. Y por eso, una vuelta aprobada l’actual llei d’usu y promoción, ustedes siempre la aplicaron de forma descaradamente restrictiva.

La so política llingüística siempre descansó n’eso: en nun tener una idea clara y en facer ver que cumplíen col mandatu estatutariu que-yos obligaba a “promover” el bable. Y poco más. Y, eso sí, en conceder subvenciones.

Eses fueron siempre les sos prioridaes: pa los sos faraónicos proyectos culturales había perres abondo. Pal Niemeyer, pa la Llaboral y pa la montonera de nuevos equipamientos culturales qu’ustedes inventaron había recursos a embute. Recursos que bien sabemos ónde acabaron. Pero pal nuestrupatrimoniu non. Pal nuestru patrimoniu había bien poco. Nin pal prerrománicu, nin pal asturianu. Pa eso quedaben namás los restos.

Pero el problema ye qu’agora ya nun queda nin siquiera eso. Agora ustedes ya nun s’esmolecen en disimular siquiera. Y, por eso, agora –nesti proyectu de presupuestos- los recortes brutales que tan ustedes aplicando a la promoción del asturianu enseñen a les clares el bien poco interés que siempre tuvieron con esti asuntu.

Tamién te podria gustar