El Premiu lliterariu ‘Tigre Juan’ empecipia la so 37ª edición

El Premiu lliterariu ‘Tigre Juan’ empecipia la so 37ª edición
02 13:29 2015 Imprimir

La principal novedá d’esta edición ye la incorporación d’una estauína en bronce realizada por Jaime Herrero como nuevu símbolu d’esti Premiu.

El presidente de la Fundación Municipal de Cultura y edil de Cultura, Roberto Sánchez Ramos, el director de Tribuna Ciudadana, Javier Gámez y el pintor y escultor Jaime Herrero presentaron esta selmana pasada la 37 edición d’esti premiu lliterariu.

La principal novedá d’esta edición ye la incorporación d’una estauína en bronce realizada por Jaime Herrero como nuevu símbolu d’esti Premiu. El mesmu autor esplicó que la pieza ta inspirada na litografía qu’hasta la fecha apurríase a los ganadores.

Al premiu, entamáu por Tribuna Ciudadana y patrocináu pol Conceyu, presentáronse anguaño más de 70 trabayos. Tres cuatro reuniones del xuráu, cinco obres llegaron a la fase final:  ‘Nosotros H’ (Ignacio Ferrando), ‘Distancia de rescate’ (Samantha Sebling), ‘Sin Música’ (Chus Fernández), ‘Entre culebras y extraños’ (Celso Castro), y ‘El arte de la fuga’ (Vicente Valero).

El nome del ganador y del finalista del certame va conocese nel intre d’una gala que va tener llugar el próximu 26 de noviembre nel Salón de té del Teatru Campoamor.

Amás d’esti eventu, en paralelu desenvolveránse les Xornaes ‘Otoño del Tigre’, un ciclu de meses redondes qu’empiezaben la selmana pasada con “De les voces qu’escribo”, un alcuentru lliterariu nel que l’autor Mario Martín Xixón faló con Eduardo San José y Ángela Martínez nel salón d’actos de la Biblioteca d’Asturies. Martín Xixón ganó’l Tigre Juan en 2012.

Les xornaes van desenvolvese hasta’l próximu 13 de noviembre y nelles van participar dellos escritores como Martín Casariego (4 de noviembre), Manuel Jabois (6 de noviembre), Ricardo Menéndez Salmón (11 de noviembre) y Carmen Gómez Güeya (13 de noviembre. Nesti casu, van tener llugar la sala cultural de Liberbank.

Coles mesmes, dende Tribuna Ciudadana cuntóse cola collaboración de la rede de biblioteques municipales y de los llibreros d’Uviéu pa potenciar esti certame.El conceyal de Cultura amosóse na presentación “bien contentu” de recuperar esti galardón lliterariu que tuvo dellos años ensin convocase “por una decisión política del ex alcalde Gabino de Lorenzo” y que se recuperó’l pasáu añu dientro del alcuerdu alcanzáu ente los grupos municipales d’IX y el PP.

  Categories:
Loading Facebook Comments ...