El premiu de novela ‘Café Gijón’ recibe 260 orixinales, la cifra más alta na hestoria’l certame

by asturnet | agosto 2, 2004 11:48 pm

El Premiu ‘Café Gijón’ supérase a sí mesmu. El prestixosu galardón lliterariu, entamáu en 1949 nel establecimientu madrilanu del mesmu nome y patrocináu anguaño pol Ayuntamientu de Xixón, recibió na so edición de 2004 un total de 260 noveles aspirantes, once más que l’añu pasáu y la mayor cifra contabilizada na hestoria’l certame.

Asina lo precisó esti mediudía la conceyala xixonesa de Cultura, Mercedes Álvarez, que se felicitó pola gran participación d’autores nel concursu y, magar de nun avanzar quién formará parte’l xuráu que va conceder el galardón, anunció qu’esi xuráu emitirá’l so veredictu a mediaos de setiembre nel escenariu habitual, el Café Gijón, asitiáu nel madrilanu paséu de Recoletos.

Al premiu concurren nesta edición testos aportaos de países estremaos ente los que figuren Israel, Estaos Xuníos, Cuba, Ecuador y Colombia, con un pesu destacáu, según esplicó Álvarez, de los orixinales empobinaos a concursu dende Llatinoamérica. De toes eses obres saldrá un únicu ganador que verá editada la so novela pola casa Acantilado y recibirá los 18.000 euros con que ta dotáu el galardón.

L’emblemáticu certame nació en 1949, alitáu por un grupu d’intelectuales encabezaos por Fernando Fernán-Gómez, Eduardo Haro-Tecglen, Manuel Aleixandre y el premiu Nobel Camilo José Cela. Dende 1989, el Conceyu de Xixón revitalizó’l concursu asumiendo la dotación y promoción del premiu, que na so última edición recayó nel ayerán Fulgencio Argüelles, pola novela ‘El palacio azul de los ingenieros belgas’.

Source URL: http://asturnews.com/el-premiu-de-novela-cafe-gijon-recibe-260-orixinales-la-cifra-mas-alta-na-hestorial-certame/