Portada Política El PP dexa claro que nun va pronunciase pola oficialidá depués d’aconceyase col CAO

El PP dexa claro que nun va pronunciase pola oficialidá depués d’aconceyase col CAO

by asturnet

El Partíu Popular dexó nidiu esti día que la oficialidá de la llingua asturiana nun s’alcuentra ente les sos prioridaes y que denguna manera va asumir la propuesta que güei-y presentó’l Conceyu Abiertu pola Oficialidá (CAO), como intento facero colo demás Grupos parlamentarios de la Xunta Xeneral del Principáu. El PSOE nin siquiera recibió al CAO. IX-BA-LV fizo anuncia del so apoyu a la propuesta y a la defensa dafechu de la cooficialidá.

Joaquín Aréstegui, hasta agora cabezaleru del PP a la hora d’afalagar les posibilidaes de meyora nel Estatutu d’Autonomía pa cola llingua astuiriana, dexó cayer el mazcaritu y finó l’antroxu que’l so partíu lleva alendando dende va meses: nun va haber denguna posibilidá de que la llingua asturiana seya oficializada na presente reforma del Estatutu, si depende del PP, colo que se suma a la postura medieval del PSOE nesta tema.

Xulio Casado y Fernando Ornosa foron los representantes del CAo que s’aconceyaron colos partíos representaos na Xunta y que-yos dexaron en manu la propuesta d’artículu cuartu del Estatutu d’Autonomía qu’ayeri ficieron pública nun actu énte’l edificu de la Xunta Xeneral.

La propuesta del CAo dexa a les clares plantegamientos básicos per todo conocíos: “les llingües cooficiales del Principáu d’Asturies son el castellanu y l’asturianu. El gallego-asturianu, tamién ye llingua oficial nel so ámbitu territorial. Tolos ciudadanos tienen derechu a conoceles y usales. Naide va poder ser discrimináu pola mor de la llingua que llibremente escueya y utilice. Les Alministraciones públiques han garantizar l’usu normal d’estes llingües, amás de la so promoción, enseñanza y presencia amañosa nos medios de comunicación. Una llei de la Xunta Xeneral del Principáu tien de determinar los criterios del procesu de normalización llingüística”.

Tamién te podria gustar