El PP da un pasu más na llucha contra l’asturianu torgando los planes de normalización nos conceyos

El PP da un pasu más na llucha contra l’asturianu torgando los planes de normalización nos conceyos
29 marzu 11:43 2016 Imprimir

Nuna decisión fora de les sos competencies y faciendo una interpretación “torticera” de la Llei d’Usu del Asturianu, la Delegación del Gobiernu en manes del PP y de Gabino de Lorenzo vieno acabante dexar a les clares que va torgar la normalización del asturianu y pon enrriba la mesa otra vuelta la dicotomía oficialidá o nada.

El Plenu de Carreño aprobó’l 28 de xineru colos votos del PSOE, Somos-Carreño ya IX la puesta en marcha d’un ambiciosu plan destináu a la normalización de la llingua asturiana nel conceyu. Una iniciativa impulsada dende’l Principáu que diba sirvir pa sentar les bases pal so emplegu per parte de los vecinos. Asina lo esplicó d’quella la conceyala de Cultura, Cecilia Tascón, quien matizó que con esti programa nun intentaben que tol mundu fale l’asturianu, “sinón que cada ciudadanu escueya lo que quier falar”.

La puntualización facíala en respuesta al Partíu Popular, que refugó la propuesta argumentando razones de tipu llegal y económicu, polo que plantegó al Plenu la so retirada del orde del día. Tascón aportunó que’l proyectu ellaboráu pol Serviciu de Normalización Llingüística de la Mancomunidá tien como oxetivu l’usu público y visible de la llingua asturiana nel conceyu. Y que va sirvir ademas p’amparar el derechu que tienen los ciudadanos de conocer y utilizar esta llingua llibremente, facilitando pa ello los medios. Pero dende’l puntu de vista del PP, qu’abogó pol usu y promoción de la llingua, el plan escarecía d’una memoria económico y xurídico. Por estos motivos consideraron que tendría de retirase del orde del día, col refugu del restu de grupos ya impugnaronlo darréu.

Y agora, la Delegación del Gobiernu alega defectos de forma nel procedimientu y la interpretación de la Llei d’Usu como que les midíes de promoción nun correspuenden a los conceyos lo que fadría imposible desenvolver en dengún otru conceyu onde ya se plantegara, como Xixón, un plan de normalización social de la llingua.

La referencia qu’emplega la delgación del gobiernu pa sostener esti intervencionismu desmesuaráu nes competencies de los conceyos, que namái se da nel ambitu cultura cola cuestión llingüística ye una sentencia del TSXA sobre l’ausencia de competencies de los propios conceyos pa facer cooficial (sic) al asturianu xunto col castellanu.  Hai años el Tribunal Superior de Xusticia d’Asturies (TSXA) anulara les diferentes declaraciones d’oficialidá cásique una docena d’ayuntamientos asturianos tres los recursos de la Delegación del Gobiernu estatal n’Asturies.

Tres consultar al direutor xeneral de Coordinación de l’Alministración Periférica del Estáu del Ministeriu de Facienda y Alministraciones Públiques, y recibir un informe al respetive, Gabino de Lorenzo como Delegáu del Gobiernu señala que l’alcuerdu ye “una estralimitación de la competencia municipal” igualando un plan de normalización a la aplicación de la oficialidá, como dicía’l PP de Carreño.

L’informe del que se fala entiende que’l Plan de Normalización Llingüística contién normes de calter regulatoriu o normativu como “el reconocimientu como méritu equiparable con otros na función pública llocal la realización de cursos de llingua asturiana pa l’alministración; o por exemplu la ellaboración d’actes n’asturianu; o aprobar una ordenanza d’usu del asturianu y billingüismu pal Ayuntamientu” y plantega qu’eso ye asemeyao a la oficialidá, cuando nun hai comparanza posible. Ye una interpretación política que dexa bien a les clares que nun hai términos medios pal PP: Oficialidá o Nada.

Loading Facebook Comments ...