El PP balta la iniciativa d’IX pal cine

by asturnet | marzo 12, 2014 9:44 am

El PP balta la iniciativa d’IX qu’encamentaba al gobiernu del PP a presentar un nuevu modelu de financiamientu del cine que nun punxera en peligru’l presente y el futuru de la nuesa industria cinematográfico. El Grupu Popular nel Congresu recurrió esti día a la so mayoría absoluta pa baltar la proposición non de llei d’Izquierda Xunida, defendida pola diputada Ascensión de les Heras na Comisión de Cultura, pola qu’encamentaba al Gobiernu a presentar nun plazu máximu de dos meses un nuevu modelu de financiamientu del cine. La iniciativa foi sofitada pol restu de grupos.

De les Heras recordó na so intervención que desque s’aprobó’l Fondu de Protección de la Cinematografía de 2007 les dotaciones fueron amenorgando. “Esti Gobiernu, llueñe d’actuar ante la cayida d’ingresos pola crisis, amenorgó les ayudes más del 50% y xubió l’IVA cultural hasta’l 21%. Por cuenta de eses polítiques suicides ta en peligru’l presente y el futuru de la nuesa industria cinematográfico; ta en peligru’l so presente y el so futuru”.

La iniciativa parlamentaria d’IX, ente otres cuestiones, reclamaba al Executivu del PP qu’actualice’l sistema d’ayudes del Institutu de la Cinematografía y de les Artes Audiovisuales (ICAA) y que dote al Fondu Nacional de Cinematografía d’un presupuestu suficiente pa desenvolver “una política eficaz y sostenible d’ayudes directes a la cinematografía y l’audiovisual conforme a les propuestes de tolos sectores, y que se contemple un aumentu de los incentivos fiscales”.

Source URL: http://asturnews.com/el-pp-balta-la-iniciativa-dix-pal-cine/