El poeta Ángel González foi nomáu Fíu Predilectu d’Uviéu

El salón de plenos del Conceyu acoyó esta selmana l’actu de nomamientu como Fíu Predilectu, a títulu póstumu, al poeta uvieín Ángel González.

Amás de la Corporación municipal, encabezada pol Alcalde, tamién asistieron Susana Rivera, vilba d’Ángel González y María Payeras, catedrática de Filoloxía y encargada de glosar la so figura, amás d’autoridaes y amigos del poeta nun actu qu’entamó cola llectura, per parte del secretariu municipal, del escritu pol cual el conceyal de Cultura, Roberto Sánchez Ramos, solicitaba esti nomamientu.

María Payares resumió la so vida. “Esti asturianu del mundu nació un 6 de setiembre de 1925 (…) Vivió la so infancia nesta ciudá, nuna dómina convulsa. Una enfermedá llevolu a Pandoriales del Sil (Llión). Dempués Madrid, y Sevilla y Barcelona…El so amigu y vecín de la infancia, Carlos Bousoño animó-y a convertise en poeta. Y volvió a la so tierra (…) para realcontrar el ciñu de vieyos y nuevos amigos. Les alcordances d’esa infancia y mocedá asturiana ye un inconfundible chisgo a Uviéu, la so ciudá cero, el puntu de partida. Depredador d’intres, Ángel enseñónos a escorrer la utopía. Foi un malabarista de palabres”.

Claudia Granaos y Pelayo González, alumnos de sestu de Primaria del colexu Poeta Ángel González, lleeron dos  poemes del autor. Y darréu l’alcalde empezó la so intervención asegurando: “Déxenme, de primeres, estimar a Susana Rivera la so presencia nesti Salón de Plenos, para ver cumplíu un deséu que para dalgunos de nós yera xuna asignatura pindia nesti Conceyu dende va munchos años: la concesión del Títulu de Fíu Predilectu al nuesu poeta, a Ángel González, xuna delda qu’agora intentamos saldar en forma de tributu a la so memoria. L’agradecimientu tamién de la Corporación a tolos amigos y amigues, compañeros y discípulos d’Ángel González que quixeron acompañanos nesti actu. Y de forma especial a la cátedra universitaria que lleva’l nome del poeta por faer posible que celebremos esta distinción nel marcu d’un congresu internacional como’l qu’estos díes tien llugar na nuesa Universidá”.

Susana Rivera, vilba del poeta, en recibiendo’l pergamín qu’acredita’l títulu de Fíu Predilectu, estimó “esti gran honor que se-y concede a Ángel González. Siempres dicía que nunca ye tarde.” Y darréu  lleó unes palabres sobro Uviéu del propiu poeta, d’un programa “Esta ye la mio tierra”: “(…) Viví nunes de les ciudaes con menos díes de sol y más lluvioses d’España (…) Veo al mio mesmu protexíu por un paragües. Y depués, yá en casa, la imperativa de la mio madre ordenar que me quitar rápido los zapatos. Asina yera siempres o casi siempres. Aquellos díes se obstinan en presentase como un ámbitu azul. (…) Tou cuanto quería taba abargana. Les persones, les coses ya inclusive los suaños…Ángel daría-yos les gracies y yo tamién”.