El Plenu uvieín da lluz verde al presupuestu de 2018

07 marzu 10:50 2018 Imprimir

El Plenu del mes de marzu aprobó, colos votos a favor de SOMOS, PSOE ya IX y en contra del PP y Ciudadanos, el presupuestu de 2018.

El conceyal d’Economía, Rubén Rosón, empezó la so intervención indicando que los númberos demuestren qu’esti equipu de gobiernu “ye’l que más gobierna n’Asturies: trés fuerces polítiques que ponemos d’alcuerdu, que consensuemos trés presupuestos y munchos aspeutos fundamentales que marquen el día ente día del Conceyu”.

El conceyal sorrayó qu’Uviéu va cuntar col presupuestu más eleváu n’inversión social de la so hestoria: “Nunca antes cuntóse con tantos fondos pa esti oxetivu” y esplicó   cómo se consiguió: “aforrando 4 millones d’euros de forma directa nos costos nel serviciu de Recaldación municipal (…), amontando los ingresos municipales al traviés del cambéu de la balanza fiscal que fai d’Uviéu una ciudá fiscalmente más xusta, y suprimiendo el gastu corriente superfluu como l’Asturcón”.

El conceyal d’Economía siguió la so intervención asegurando que “Uviéu ye una ciudá meyor porque tien más beques, más servicios y menos carga impositiva pa los uvieinos”  Tocantes a la inversión social  destacó los 4 millones d’euros qu’anguaño se destinarán a beques y ayudes a comedor y llibros; la medría de los fondos destinaos a la llucha contra’l desemplegu (que se triplicaron), la gratuidá del bus pa los menores de 12 años; l’apertura de los centros educativos demientres tolos periodos non lectivos y l’aumentu de les ayudes a asociaciones vecinales, clubes y escueles deportives. Tamién remarcó que nes cuentes de 2018 amóntase un 11% el capítulu de personal, gracies al cual van xenerase más de 600 puestos de trabayu temporales anguaño”; auméntense los servicios municipales y consolídense los nuevos servicios creaos por esti equipu de gobiernu, como ye por casu la Universidá Popular.

Pela so parte, Cristina Pontón, d’IX, empezó la so intervención indicando que na ellaboración de los presupuestos demuestrase’l tipu de política que se fai: ye d’esquierdes el compromisu con ameyorar la vida de los uvieinos, y nun empeñar a los vecinos con proyectos faraónicos”. La conceyala siguió señalando que “tenemos un presupuestu de 233 millones d’euros, con inversiones de 33 millones,  ente que’l PP destinaba los fondos a Villamagdalenas, Calatravas, spas, y a la privatización de los servicios públicos colos sobrecostos que trai”. Según la conceyala “destinemos una parte bien importante a ayudar a la xente que sufrió la crisis, porque los datos son emporfiaos: asina, ente otros, amontemos les ayudes a persones dependientes que pasaron de 3,7 millones en 2016 y 2017 a 4 millones d’euros p’anguaño”. Pontón aseguró que “la exa fundamental del presupuestu ye’l trabayu: a pesar de que Montoro empeñárase en que nun haya personal municipal” y concluyó indicando que “l’aprobación de güei ye solo’l puntu de partida, yá que se va siguir trabayando pa cumplir, polo que vamos siguir  falando de presupuestos mientres muncho más tiempu”.

Más información

  Categories:
Loading Facebook Comments ...