El Plenu d’Uviéu retira los títulos concedíos a Francisco Franco, Juan Yagüe, Federico García Sanchiz, Gerardo Caballero, Antonio Aranda y José Daniel Lacalle

El Plenu d’Uviéu retira los títulos concedíos a Francisco Franco, Juan Yagüe, Federico García Sanchiz, Gerardo Caballero, Antonio Aranda y José Daniel Lacalle
18 ochobre 09:41 2016 Imprimir

El Plenu d’Uviéu dio lluz verde, colos 16 votos a favor de PSOE, SOMOS, IX y Ciudadanos y l’astención del PP, a retirar los Títulos y Distinciones concedíos nel so día a dellos nomes de la sublevación militar del 36, la Guerra Civil y la Dictadura.

Francisco Franco Bahamonde, Juan Yagüe, Federico García Sanchiz, Gerardo Caballero, Antonio Aranda y José Daniel Lacalle, yá nun tienen nome na Ciudá d’Uviéu tal que yá aprobara’l 28 de setiembre la Comisión d’Honores y Distinciones del Conceyu d’Uviéu, na que s’indicara qu’esta propuesta,  sofitada  na Llei 52/2007, conocida como “Llei de la Memoria Histórica” en que’l so artículu númberu 15 indícase que ” les Alministraciones públiques, nel exerciciu de les sos competencies, van tomar les midíes oportunes pa la retirada d’escudos, insinies, plaques y otros oxetos o menciones conmemorativas d’esaltación personal o colectiva, de la sublevación militar, de la Guerra Civil y de la represión de la Dictadura”.

Los títulos Honoríficos y Distinciones retiraos son  los siguientes:

1) El día 26 d’Ochobre de 1934 foi reconocíu como Fíu Adoptivu de la Ciudá d’Uviéu Francisco Franco Bahamonde.
2) El día 11 d’Ochobre de 1935 foi declaráu Güéspede d’Honor de la Ciudá d’Uviéu Juan Yagüe Blanco.
3) El día 30 de Noviembre de 1934 foi reconocíu como Fíu Adoptivu de la Ciudá d’Uviéu Juan Yagüe Blanco.
4) El día 14 d’Ochobre de 1937 foi reconocíu como Fíu Adoptivu de la Ciudá d’Uviéu Federico García Sanchiz.
5) El día 1 d’Abril de 1937 foi reconocíu como Fíu Adoptivu de la Ciudá d’Uviéu Gerardo Caballero Olabézar.
6) El día 30 de Xunu de 1938 la Corporación Municipal “alcordó por aclamación proclamar” Alcalde honorariu de la Ciudá d’Uviéu a Antonio Aranda Mata.
7) El día 14 d’Ochobre de 1964 foi-y otorgada la Medaya d’Oru de la Ciudá d’Uviéu a Francisco Franco Bahamonde.
8) El 2 de Setiembre de 1968 foi-y otorgada la Medaya d’Oru de la Ciudá d’Uviéu a José Daniel Lacalle Larraga.

El conceyal de PSOE Ricardo Fernández, empezó la so intervención estimando l’esfuerzu de les  agrupaciones que tán trabayando por llevar a bon términu’l trabayu encargáu pol alcalde d’Uviéu de faer cumplir la Llei de la Memoria Histórica. Según sorrayó, ésta “ye la primer  vegada que se garrasti a una esperiencia asemeyada” na nuesa ciudá, cola retirada de cuatro título  de fíu adoptivu, Alcalde honorariu y  Güéspede d’Honor, amás de dos medalla d’oru. El conceyal esplicó qu’a pesar  de “les voces que clamen por dexar les coses como tán” y “aquellos que dicen que queremos camudar la hestoria” l’equipu de gobiernu tien la voluntá “de faer cumplir la llei” y defende que ” el pasáu hai que conocelo lo meyor posible por que les nueves xeneraciones sían conscientes” de lo vivío. Fernández, concluyó asegurando que tienen “el convencimientu y la voluntá necesaria pa que se cumpla la llei, non sede de vengances”.

Pela so parte, Ana Taboada de SOMOS, aseguró que cola astención  del PP, ésti partíu “vuelve escaecese de cumplir cola llegalidá, porque Uviéu lleva 10 años” ensin acatala. La concejala aseguró que na última década “pocu más d’un par de cais camudaron” los sos nomes, polo que “ye de xusticia faelo agora” yá que al so xuiciu, la denominación de los espacios públicos sirve pa promover valores ente la ciudadanía. Taboada aseguró que se sienten “obligaos a ser firmes” nesti aspeutu “porque sigue siendo una ferida abierta (…) El cambéu históricu vien de la xente, que yá nun tien mieu, como se tenía na Transición”, concluyó.

Dende IX, Roberto Sánchez Ramos, empezó la so intervención estimando “el trabayu de toos aquellos que trabayaron pola democracia”. Aseguró que “esti plenu ye históricu” porque “llega con 30 años de retrasu”. Nesti sentíu indicó que “países  como Alemaña ya Italia, solucionar fai 60 años” . Pal conceyal, l’alderique ta “bien claro: la memoria o l’olvidu, dexar pasar la hestoria y a les persones”. Por ello, considera que los cuatro grupos que votaron a favor d’esta retirada de títulos, decidieron “coyer el toru polos cuernos”.

L’astención del PP foi defendida por  Agustín Iglesias Caunedo, quien  aseguró qu’el so partíu tomó esta decisión “pol procesu que los llevó hasta equí”. Aseguró que les reconocencies que güei se retiren “tán escastaos” desque los sos protagonistes finaron, el postreru en 1981. “¿Qué sentíu tien retirar distinciones a daquién que yá non les tien?” preguntóse’l conceyal, quien siguió asegurando qu’esta decisión vien de “la incapacidá” del equipu de gobiernu “pa tenenos entreteníos”.  El conceyal siguió asegurando que’l PP “nun va ser cómpliz” d’esta decisión “que da vida a estos honores, que yá taben escaecíos (…) y que solo contribúin a estremar”.

Per parte de Ciudadanos, Luis Pacho refartó al PP la so astención, yá que según sorrayó “les lleis tán pa cumplise, y si nun-yos gusta, podíen  habelo derogao, porque tuvieron cuatro años de mayoría absoluta”.

  Categories: