El plenu de setiembre va votar l’adhesión d’Uviéu a la Rede de Conceyos pol Estáu Laicu

El plenu de setiembre va votar l’adhesión d’Uviéu a la Rede de Conceyos pol Estáu Laicu
07 setiembre 18:33 2016 Imprimir

Los conceyales Isabel González Bermeyu, Diego Valiño y Cristina Pontón presentaron esta mañana xunto a Francisco Delgado y Jose Luis Iglesias, presidentes d’Europa Laica y Asturies Laica respectivamente, la moción qu’esta tarde va aldericar el plenu ordinariu del mes de setiembre pa xuntase a la Rede de Conceyos pol Estáu Laicu.

La llaicidá, dixo la conceyala de Somos, Isabel González Bermeyu, ye “una asignatura ensin aprobar n’Asturies” na qu’hai que trabayar.  Xunise a esta rede ye digno y necesario”, siguió’l  conceyal socialista Diego Valiño, ye “una bona noticia (…) pa consiguir la verdadera imparcialidá nes alministraciones públiques”.  La vocera d’IX, Cristina Pontón aseguró que trabayar pola llaicidá ye un exerciciu de sanidá institucional” una y bones “nun supon un agraviu a nenguna confesión” sinón avanzar nel respetu a toes elles.

Pela so parte Francisco Delgado, presidente d’Europa Laica, empezó la so intervención felicitando a Uviéu por  llevar al plenu esta moción d’adhesión yá que, según indicó, “ye difícil llegar a alcuerdos tan revesosos como ésti”.  Delgado siguió esplicando qu’Uviéu se convertirá na primer capital de provincia n’incorporase a la rede que yá cunta con  mediu centenar de conceyos. Según les sos previsiones, otros 60 consistorios van aprobar la so inclusión primero que remate l’añu, cuando se preve entamar la primer asamblea. Según esplicó José Luis Iglesias, va ser dende ési órganu dende onde s’empiece a trabayar pa pone-y cara a les inxerencies del Estáu nes alministraciones locales” y se dexe de beneficiar “a una sociedá privada de creyentes”.

  Categories: