El Plenu aprueba proponer a Uviéu como Patrimoniu de la Humanidá

El Plenu celebráu esti día pela mañana aprobó proponer  la ciudá d’Uviéu como Patrimoniu de la Humanidá. La midida, presentada pol grupu VOX, cuntó amás  col votu a favor de PP, Ciudadanos y SOMOS y l’astención de PSOE.

La primera en tomar la palabra foi Cristina Coto, de Vox, quien presentó esta propuesta como un mediu pa “defender el nuesu patrimoniu”. La conceyala quixo estimar el sofitu del equipu de gobiernu y a personalidaes ayenes a l’alministración que s’amosaron favorables a ella, como l’arquiteutu Victor García Uviéu, Adolfo Casaprima  (“que denunció’l deterioru del nuesu Uviéu monumental”)  o’l presidente de Otea.  Esta propuesta, siguió Coto, “trata de sumar, lo destructivo ye poner palos nes ruedes”.

Dende SOMOS. Anabel Santiago, anunció que sofitaríen la midida anque nun se tuvieren en cuenta les sos enmiendes, anque denunció que nesta propuesta hai “incongruencies” que tienen de correxise “pa nun quedar en ridículu énte la Unesco”. La conceyala apostó por pidir esta declaración “namá pal cascu vieyu porque una llicencia d’una obra menor  podría tardar meses y xeneraría  caos”.  Tamién apostó pola señalización de monumentos y que se refugue rondar Norte “que taraza y destrúi unu de los monumentos reconocíu yá como Patrimoniu de la Humanidá”.

El conceyal de Ciudadanos, Jose Luis Costillas, empecipió la so intervención indicando que “creemos que toos compartimos la idea de qu’Uviéu merez la reconocencia mundial pol so patrimoniu y hestoria. Tenemos el luxu de tener trés xoyes del prerrománicu nun estáu de caltenimientu envidiable. Amás, la Catedral, edificios emblemáticos, somos l’orixe del Camín y la muralla medieval qu’anguaño vamos recuperar a la fin. Ye ciertu que yá tenemos elementos nesa llista de Patrimoniu de la Humanidá, pero que se declare la ciudá ye una ferramienta pal caltenimientu de la ciudá, lo que va suponer xuna gran proyección a nivel internacional, ayudes del Ministeriu de Cultura, mayor promoción turística…”.

Pela so parte, el conceyal socialista Diego Valiño recordó q’hai “23 años vuelve intentase consiguir esta declaración” Y añedió que dende’l PSOE quier contribuyise a que la candidatura sía un ésitu pa lo que presentaron un total de 8 enmiendes (toes elles refugaes) nes que se solicita delimitar l’ámbitu de la candidatura, al “Uviéu Redondo” y al “Uviéu Industrial” por que la propuesta nun sía refugada como nos años 90. El conceyal solicita tamién la ellaboración per parte de técnicos d’Urbanismu y Cultura d’un informe de viabilidá, “porque abarruntamos que’l pidimientu nun tuvo en cuenta los antecedentes” y el desenvolvimientu d’un plan estratéxicu que nos lleve a presentar la candidatura”.

El conceyal del PP, Gerardo Antuña solicitó la unanimidá nesti puntu del día, “porque ye una propuesta política pero non partidista; porque vien ameyorar l’arguyu uvieino, el curiosu turísticu y cultural que yá tien la nuesa ciudá”. El conceyal siguió indicando que llega amás de la mano de la oposición y que “ésti ye tan solo un pistoletazu de salida, porque hai que trabayar y enforma.(…). Nel 98 yá s’intentó, y espero que nesta ocasión, col trabayu de toos y ensin perxuiciu de quien lo propón, pueda sacase alantre, porque va ser  bonu pa los uvieinos y les persones que vengan visitanos”, concluyó.