Portada Conceyos El plazu d’inscripción nel II concursu “Avilés Empreses” conclúi’l 15 de setiembre

El plazu d’inscripción nel II concursu “Avilés Empreses” conclúi’l 15 de setiembre

by redacción asturnews

El plazu d’inscripción nel II concursu “Avilés Empreses” conclúi’l 15 de setiembre y la iniciativa ganadora va esfrutar d’un añu d’estancia gratuita nel Centru d’Empreses La Curtidora, lo mesmo que de acompañamientu personalizáu mientres tol periodu.

El certame, convocáu pol Conceyu d’Avilés al traviés de la área de Promoción Empresarial, ta dirixíu a persones que tengan una idea empresarial susceptible de ser llevada a cabu nel conceyu d’Avilés y l’oxetivu d’esta convocatoria ye favorecer la nacencia de nuevos proyectos empresariales n’Avilés y facilitar el so establecimientu nel Centru d’Empreses La Curtidora por aciu un premiu qu’inclúi un añu de gratuidá nel arriendu de la oficina, el desenvolvimientu de midíes que contribuyan a la so viabilidá y un serviciu d’acompañamientu personalizáu.

Amás, va apurrise a la iniciativa premiada una bolsa de viaxe para asistir al 9º Foru Européu pa la Ciencia, Tecnoloxía ya Innovación, que se va celebrar en Málaga en febreru de 2020. Los proyectos que se presenten pueden, o bien atopase en fase embrionaria, o bien tratase d’iniciatives de nuevu cuñu qu’empecipiaren la so actividá con posterioridá al 1 de xineru de 2019.

Les idees empresariales van ser valoraes según el grau de preparación y maduror que presenten pa so puesta en marcha. Coles mesmes, va valorase positivamente que cunten con un componente innovador y/o tean rellacionaes con tecnoloxíes disruptivas, que respuendan a demandes y necesidaes a escala local, que tengan una incidencia positiva escontra l’empléu, y que tean promovidas por persones pertenecientes a los colectivos de menores de trenta años y/o mayores de 45.

Les bases íntegres de la convocatoria pueden ser consultaes faciendo clic equí

Tamién te podria gustar