El Plan piloto d’usu del asturianu fina’l so primer añu con un bon balance

El Plan piloto d’usu del asturianu fina’l so primer añu con un bon balance: les families encamentaríen a otres que parciparon dafechu nelli y el profesoráu acaba pidiendo más material didácticu.

El 90 per cientu de les families que los sos fíos participaron nel plan piloto para la promoción y usu del asturianu nel cursu 2017-2018 valoraron favoratiblemente esti apueste de la Conseyería d’Educación, nel que participaron 105 alumnos y alumnes de seis centros de públicos de la rexón. En rueda de prensa, el director xeneral de Planificación Llingüística y Normalización, Fernando Padilla, afirmó qu’esti plan desenvolvióse con total normalidá y con un altu grau de prestu de la comunidá educativa.

Los centros pioneros nesta esperiencia fueron el CP Santiago Apóstol de Mieres, el CP El Cotayo de Carbayín, el C.P. El Bosquín de L’Entregu, el CP Bernardo Gurdiel de Grau, el CP La Carriona-Miranda d’Avilés y el CEIP Xentiquina de Solvay-Lieres. Éstos aplicaron el plan n’alumnáu de cuartu cursu de Primaria, escoyéndose una de les siguientes árees para llevalo a cabu: Ciencies Sociales, Ciencies Naturales, Educación Física o Educación Artística.

Padilla apuntó que más del 83,6 per cientu de les families que participaron nel plan piloto comentaron qu’encamentaríen a otres la participación nesti plan. El númberu total d’estudiantes que participaron foi de 105, representando un 3,41 % del total del alumnáu que cursó Llingua Asturiana y Lliteratura en cuartu cursu de Primaria, «una amuesa escasa», según reconoció Padilla.

El profesoráu qu’impartió’l plan y qu’amás exerció les funciones de coordinación fueron maestros con destín definitivu nel centru, que cuntaba cola habilitación necesaria para poder impartir Llingua Asturiana y tamién l’área non llingüística escoyida nel plan.

Padilla quixo dexar bien a les clares que de les xuntes de siguimientu esprendese que l’asturianu consiguió un grau de normalización bien altu nos centros participantes, yá que s’integró con total normalidá ente les families y l’alumnáu a la de llevar a cabu les actividaes de centru.

No relativo a les resultancies académiques llograes na materia non llingüística oxetu del plan, en estableciéndose una comparanza coles resultancies llograes pol alumnáu na mesma materia’l cursu anterior, concluyóse qu’el 41,59 % de los estudiantes ameyoraron les resultancies llograes y un 42,57 % de los mesmos caltuvieron les sos calificaciones.

En cuanto al profesoráu participante, consideró bien positivamente la esperiencia, apuntando la necesidá d’ellaboración de materiales didácticos afechos al asturianu y rellacionaos cola área qu’impartieron nel plan pa facilitar el desenvolvimientu del so llabor docente. Nesti sentíu, Padilla añedió que’l profesoráu pide un aumentu de los recursos humanos y materiales pa impartir estes clases ya indicó qu’hasta’l momentu ye’l maestru’l que prepara y ellabora el so material didáctico.

Anguaño atópase en marcha’l segundu plan piloto nel que participen los mesmos centros pero impartiendo clas d’asturianu en diez aules, yá que en cuatro de los colexos decidióse ufiertar esti aprendizaxe en quintu cursu. A lo último, Padilla indicó que nun s’aumentó’l númberu de centros porque nun disponíen de la evaluación d’esti plan antes del empiezu de cursu y señaló que ye posible que si s’aumentare’l númberu de centros habría que destinar una partida económica al plan qu’agora se desenvuelve ensin costu dalgunu.