El pianista Antonio Baciero actúa esti miércoles nel Xovellanos

El pianista y musicólogu Antonio Baciero (Aranda del Douru, 1936) ye un artista hondamente venceyáu a Xixón, al traviés de la Sociedá Filarmónica. Dende la década de los setenta, del pasáu sieglu, Baciero non yá foi intérprete peracabáu de Bach, Mozart y Schubert nes temporaes filarmóniques, sinón tamién el musicólogu sensible ya inquietu que dio a conocer en Xixón la gran música de tecla de la renacencia y barrocu español, dende Antonio de Cabezón a compositores “hispanizados como Domenico Scarlatti.

Antonio Baciero foi premiu estraordinariu nel Conservatorio de Madrid, en 1954. Amplió estudios en Siena, con Guido Agosti, y en Viena, con Viola Trern, Paul Badura Skoda, Jörg Demus y Alfred Brendel. En 1961, al ganar el premiu fundáu por Arturo Benedetti Michelangeli n’Italia, empieza una brillosa carrera internacional con finxos como la presentación, en 1962, en Viena n’un mesmu recital de los Seis partitas, de Bach o’l Ciclu de Música Española nel Conservatorio Chaikovski de Moscú, que combina con una intensa dedicación musicolóxica ya interpretativa a la música española. Nesti campu ibérico, grabó para Hispavox la integral de la música d’Antonio Cabezón, y dellos discos dedicaos a los maestros del barrocu español.
Antonio Baciero va interpretar nesti conciertu dos de el compositores que son la pasión de la so vida. Una primer parte dedicada a la música d’Antonio de Cabezón y la segunda parte, a la música para pianu de Franz Schubert.

Entama: Sociedá Filarmónica Miércoles,
15 de Mayu de 2019 – TEATRO XOVELLANOS