El personal de les oficines de normalización denuncia la situación de la rede municipal

L’Asociación de Trabayadores de la Normalización Llingüística (ATNL), acabante constituíse y que xunta al personal de los servicios de promoción del asturiano, denuncia la situación de la Rede tres años después de ponese en marcha. El colectivu alerta que de les diez oficines abiertes namás seis permanecen actives anguaño.

L’asociación responsabiliza a la Conseyería de Cultura de la situación creada y d’incumplimientu del compromisu adquiríu nel so día pola titular del departamentu, Ana Rosa Migoya, cola normalización y dignificación del idioma al través de la rede de servicios municipales. La decicisión de xuntase nun colectivu naz de la situación esistente, según afirma l’ATLN.

Los trabayadores de les oficines de promoción del asturiano avisen de que’l procesu de normalización “ta desenvolviéndose en munchos casos nunes condiciones que nun son les meyores nin les más eficaces: precariedá llaboral, falta de voluntá política, arrequexamientu nel organigrama municipal, inestabilidá, falta de recursos, etc” y afirmen que “la situación a 4 de febreru ye que de diez SNL que se crearon nel 2005, solo tán n’activo seis”.

Dende l’ATLN defenden que “los Conceyos han garantizar el llabor de los SNL con unes midíes de mínimos: asegurar l’allugamientu afechiscu del serviciu nel organigrama del Conceyu; garantizar el plenu rindimientu del SNL; faer de la llingua asturiana una cuestión tresversal en tolos ámbitos del conceyu; desendolcar aiciones concretes que vaigan normalizando socialmente la llingua asturiana”. Pa l’asociación ye el Gobiernu del Principáu d’Asturies “ye quien tien la competencia en materia de normalización llingüística, polo tanto ye él quien tien d’asegurar que la normalización llingüística se tresllade a los conceyos asturianos, como lo fai con otru tipu de servicios, como un compromisu claru d’avanzar”.

A la fin l’ATLN cuida que la situación actual y la verdadera normalización namás podíen solventase cola reconocencia oficial de la llingua asturiana y dexen en manes del gobiernu autonómicu esa responsabilidá y consideren “que’l nun lo facer ye un actu de gran irresponsabilidá pa col pueblu asturianu y pa cola so cultura”. El colectivu resume’l so planteamientu final en que “la oficialidá de la llingua asturiana y la posterior llei de normalización llingüística ye la única garantía de que los derechos llingüísticos de los/es asturianos/es van ser respetaos”.