El PAS esplica la so non participación nel actu impulsáu pol Bloque pal 8-S

03 setiembre 10:47 2010 Imprimir

El Partíu Asturianista unvió güei a los medios de comunicación una nota que da anuncia de los actos de celebración del Día de la Nación, que van facer, xunto a la URAS y énte’l «Monumentu a la mina y a la mar» de Candás, esti miércoles 8, a les 13:30 hores.

La formación nacionalista esplica nesi mesmu documentu como “a lo llargo d’una serie de selmanes, caltuvo negociaciones cola voluntá de facer un Día d’Asturies o Día de la Nación unitariu”, qu’a la fin nun-yos paecieron afayadices “pol formatu del actu (una concentración, qu’imposibilita laxerarquización d’organizaciones y persones y la so visualización, y non una manifestación)” y pola composición de los convocantes, que según el PAS “escapa a la nuestra idea d’un actu organizáu y xestionáu polos partíos políticos”. El PAS desea, sicasí, a Bloque y UNA “una feliz celebración”.

El PAS quixo facer pública tamién, la so comunicación final col Bloque por Asturies y la UNA, onde-yos dieron anuncia de la so decisión final:

Estimaos:

El PAS recibió nel so día una invitación vuestra pa una manifestación unitaria pal 8 de septiembre de 2010. Anque con reserves por delles razones, en principiu paeciónos bien, porque, como siempre pensamos, esti país necesita normalizase en munchos aspectos, ente otros, los relativos al 8 de septiembre, que debería tender a ser unitariu y políticu, como notres nacionalidaes. Per otru llau, tamos interesaos, tamién como davezu, en mantener les meyores relaciones polítiques con toles fuerces asturianes, especialmente, les del ámbitu asturianista.

Ensin embargu, nun podemos aceptar el planteamientu final pal 8 de septiembre. De mano, porque una manifestación (que tien les sos fórmules y los sos ritos) camuda n’otra cosa. En segundu llugar, porque la iniciativa dexa de tar nes manes de fuerces polítiques pa convertise nun mangaráu d’organizaciones y colectivos, toos, ensin dulda, respetables, pero que nun encaxen, al nuestru talantar, nun marcu esclusivamente políticu, como debe ser el del 8 septiembre.

Esa modificación, polo tanto, del formatu, de los asistentes, y la impresión final que, al nuestru talantar, se treslladaría a la opinión pública de “totum revolutum” y d’actu más asemeyáu a un Primeru de Mayu qu’a otra cosa, fai que tengamos que negar la nuestra presencia con vosotros pa esa fecha. Pa la vuestra información, vamos caltener, pol contrariu, la otra parte los actos que teníamos previstos pa esa fecha, los que faremos con la URAS, colos que tenemos, como se sabe, firmáu un pactu hai tiempu.

Deseámosvos, como a tolos asturianos, un feliz día de la nación.

  Categories:
Loading Facebook Comments ...