Portada Política El Partíu Popular va pidir l’usu del asturianu nes actividaes y denomación del RIDEA

El Partíu Popular va pidir l’usu del asturianu nes actividaes y denomación del RIDEA

by asturnet

El Real Institutu d’Estudios Asturianos, oficialmente col nome en castellán, convocó apocayá elecciones a Director de la institución y dende’l 29 de payares ta abiertu’l plazu de presentación de candidatures, que va finar el 15 de xineru de 2008, proclamándose definitivo los candidatos el 25 de xineru. Humberto Gonzali, Miembru de Númberu de Representación designáu pol PP, va presentar una propuesta que pretende “asturianizar” la institución, hestóricamente a la escontra de la normalización llingüística.

El xueves 31 de xineru va celebrase la votación ente los Miembros de Númberu del Conseyu Xeneral, que son los que componen el censu electoral y con motivu d’esti procesu, el Grupu Parlamentariu Popular, va presentar un conxuntu d’iniciatives a los demás Miembros de Númberu.

Estes iniciatives formen un propuesta conxunta na que se pide, ente otres coses más, que s’avale la denominación billingüe del Institutu, que se proceda al usu de la llingua asturiana, “polo menos” a igual nivel que’l castellán, na retulación y impresos, y que se promueva l’usu del asturianu en toles actividaes a desarrollar. Igualmente Gonzali va solicitar un mayor averamientu del RIDEA a la sociedá, implicándose en tou tipu d’eventos culturales, asina como l’entamu d’actos per tola xeografía de la comunidá autónoma.

Esta iniciativa ta dientro d’un ciertu movimientu d’averamientu a una posición favoratible pa cola normalización del asturianu dientro del Partíu Popular, que nel so programa pa les elecciones autonómiques últimes incluyía la propuesta de buscar un marchu llegal pal asturianu nel futuru Estatutu. Nos últimos díes, per otru llau, la polémica abrióla Gabino de Lorenzo. L’alcalde d’Uviéu pidía mayor protección pal asturianu y la rempuesta nun tardo en llegar dende’l Gobiernu d’Asturies. La vocera, Ana Rosa Migoya, contestó al alcalde recordándo-y “que ye de los pocos conceyos que tien paráu’l procesu d’oficialización de los toponónimos tradicionales”.

Páxina web del RIDEA

Tamién te podria gustar