Portada Comunicación El parlamentu torga que la Conseyera de Cultura fale asturianu por nun ser diputada

El parlamentu torga que la Conseyera de Cultura fale asturianu por nun ser diputada

by redacción asturnews

Les incoherencies de lo que nun ye una democracia xurden cuantes menos s’espera, porque impedir qu’una representante política del gobiernu asturianu emplegue l’asturianu que los diputaos xuraron prometer difundir y promover al xurar el so cargu y qu’ellos sí puen emplegar si-yos pruye nun pue calificase sino como incoherente. Paso-y a Berta Piñán esti martes na so comparecencia na Xunta Xeneral.

En cuantes que Berta Piñán empezó a falar na so comparecencia la diputada del PP Gloria García atayó a la conseyera y pidió una traducción al castellán, mientres el diputáu de Vox Ignacio Blanco pidía permisu pa intervenir n’inglés tomando a xirigota un drechu qu’elli tien y que niega a los demás. Porque un diputáu asturiau pue emplegar l’asturianu o’l gallegu asturianu na Xunta Xeneral, pero a los demás asturianos y asturianes tórgasenos esi drechu. La presidenta de la comisión, Lidia Fernández, pidió darréu un receso pa consultar al equipu xurídicu y de resultes d’esa consulta solicitó a la Conseyera qu’interviniera en castellán, daqué que calificó Berta Piñán de “humillante”, anque faciéndolo.

Más allá del discutiniu inicial alrodiu del emplegu d’esti drechu que se diz naide nun torga n’Asturies, la llingua centró bona parte del discursu inicial de la conseyera. Nesti sentíu, Piñán desplicó en castellán que demientres la llexislatura plantegará l’alderique de la reforma nel estatutu d’autonomía. “Vamos Trabayar n’un propuesta realista, acorde cola situación sociollingüística asturiana y les sos necesidaes. va basar na non imperatividad, nel consensu y n’una implantación progresiva. Ye unu heriedu de la nuesa hestoria que tenemos de protexer”, dixo en castellán. A la de plantegar midíes concretes, Piñán anunció un Conseyu Asesor de Política Llingüística, que se va poner en marcha nos próximos meses, y que va ser representativu de la sociedá asturiana. Otra de les prioridaes va pasar pol estudiu y revisión de la toponimia tradicional y l’impulsu de la llingua nos medios de titularidá pública. El director xeneral de Política Llingüística, Antón García Fernández, sostuvo énte una entruga de la vocera d’IX, Ángela Vallina, qu’esperen tener el so modelu llingüísticu preparáu pa dempués del branu de 2020 con un desglose concretu de gastos ya ingresos derivaos d’esta oficialidá.

Tamién te podria gustar