Portada Plástiques El Palaciu de Valdecarzana acueye ‘La Naturaleza de l’Agua’ con pintures de Mar Sueiras

El Palaciu de Valdecarzana acueye ‘La Naturaleza de l’Agua’ con pintures de Mar Sueiras

by redacción asturnews

El Palaciu de Valdecarzana d’Avilés acueye la esposición La Naturaleza de l’Agua, qu’amuesa pintures de Mar Sueiras hasta’l martes 16 d’abril, nel so horariu habitual.

El Palaciu de Valdecarzana inauguró esta selmana una nueva esposición, La Naturaleza de l’Agua, de la pintora asturiana Mar  Sueiras. Espónense una serie de pintures horizontales que recreen la percepción del espaciu por aciu la representación de reflexos de l’agua, dirixiendo la mirada al traviés d’un conxuntu de secuencies. L’espaciu representase por aciu esos reflexos, estableciendo un xuegu ente lo real y lo imaxinao.

L’amuesa podrá visitase hasta’l martes 16 d’abril, nel horariu habitual del Palaciu de Valdecarzana (C/El Sol, 1): de llunes a vienres de 11:00 a 14:00 hores y de 18:00 a 21:00 hores. La entrada ye llibre y gratuita.

Nacida en Muros de Nalón, Mar Sueiras especializóse como Técnica Cimera en Dibuxu Publicitariu, y n’Estudios de Grabáu y Técniques d’Estampación, dambes na Escuela d’Arte d’Uviéu. Graduada en Belles Artes pola Universidá de Salamanca y con un Máster n’Estudios d’Asia Oriental que-y dexó estudiar arte chino, coreanu y xaponés.

Anguaño ye doctoranda n’Hestoria del Arte na mesma universidá. Perteneciente amás al Grupu d’Investigación Reconocíu HUME (Grupu d’Humanismu Eurasia), publicó artículos d’investigación en revistes académiques y tien impartío abondes charres. El so llabor profesional desenvolvióse nel campu del diseñu y del dibuxu publicitariu, y exerz como docente impartiendo cursos y talleres de pintura, dibuxu cerámica y diseñu.

Tamién te podria gustar