El Palaciu de Valdecarzana acueye la esposición “Moreno, l’alma d’un pintor”

El Palaciu de Valdecarzana acueye la esposición antolóxica “Moreno, l’alma d’un pintor”, que rescata y homenaxa la obra del artista José Ramón López Suárez, más conocíu como Moreno. L’amuesa componse de 24 pintures de diverses temátiques como semeyes, motivos relixosos, paisaxes nocherniegos o imaxes de personaxes pernomaos d’Avilés.

Anque nació en Xixón, Moreno foi avilesín d’adopción yá que desenvolvió na nuesa villa la so estensa carrera creativa, na qu’afiguraba con una gran capacidá emotiva y una mirada personal el paisaxe urbano d’Avilés y les sos xentes.

Per otru llau,el vienres a les 19:30 hores, tamién nel Palaciu de Valdecarzana, tuvo llugar un actu de reconocencia al autor nel que participó la conceyala de Cultura, Yolanda Alonso, y los familiares del artista, propietarios de la mesma de la colección espuesta.

La esposición, que yá ta abierta al públicu, podrá visitase hasta’l miércoles 29 de setiembre nel horariu habitual del espaciu asitiáu na cai del Sol: de llunes a vienres, de 11 a 14 y de 18 a 21 hores.