El nuevu videoclip de Beyoncé tien como escenariu’l Louvre

20 xunu 08:31 2018 Imprimir

Beyoncé y Jay-Z anunciaron esti sábadu pasáu y por sorpresa’l llanzamientu del so primer discu conxuntu, col que celebren el so amor. ‘Everything is love’ contien nueve cantares y el so nuevu videoclip tien como abellugu’l Louvre de Paris.

‘Everything is love’ contien nueve cantares ente les que s’alcuentra una que trata’l disgustu del raperu por dise coles manos vacíes nos postreros Grammy, ente que n’otra Blue Ivy, fía de dambos, fala a los sos hermanos. El discu yá ta disponible na plataforma Tidal, de la que Jay-Z ye parcialmente propietariu, según anunciaron a la fin d’un conciertu en Londres. La sorpresa nun ye nueva na pareya. Yá asocedió en 2013, cuando Beyoncé llanzó ‘Beyoncé’ ensin avisu previu.

En ‘Black Effect’ traten la tema racial n’Estaos Xuníos, con Beyoncé llevando la batuta nel cantar. Jay-Z menta a Trayvon Marin, adolescente negru que foi asesináu en 2012. Notru de los cantares el raperu dexa entever que refugó xuna ufierta de la NFL pal espectáculu de media parte de la Super Bowl, que finalmente recayó en Justin Timberlake. En ‘Salú’ Jay-Z ataca directamente a Donald Trump, presidente d’Estaos Xuníos. En ‘BOSS’ la pequeña Blue Ivy termina’l cantar con un saludu al so hermanu y hermanu d’un añu, Rumi y Sir.

Amás, publicaron el videoclip d’un nuevu cantar, ‘Apeshit’, tamién parte del álbum. El mesmu ta rodáu nel interior del Louvre, en París. La pareya apaez en dellos planos delantre d’obres célebres como La Gioconda, la Venus de Milo o La consagración de Napoleón. Nesti proyectu conxuntu la pareya faise llamar “The Carters” (apellíu de Jay-Z, que’l so nome real ye Shawn Corey Carter).

Tratase del primer álbum que Beyoncé y Jay-Z llancen de manera conxunta, anque yá realizaren diverses collaboraciones en cantares como “Dexa Vú” o “Crazy in Love”. Esti ye’l séptimu discu de Beyoncé, desque empezó la so carrera fora de les Destiny’s Childs en 2003, y el decimoctavu del raperu, que debuto en 1996 con “Reasonable Doubt”, y el primeru que grabaron como’l dúo “The Carters”.

  Categories: