El nuevu grau d’Inxeniería d’Organización Industrial va ufrir sólo 60 places

El nuevu grau d’Inxeniería d’Organización Industrial va ufrir sólo 60 places
09 ochobre 09:32 2017 Imprimir

Na que foi la primer xunta ordinaria nesti cursu del Conseyu de Gobiernu de la Universidá d’Uviéu diose’l vistu bonu a la implantación del grau n’Inxeniería d’Organización Industrial que previsiblemente va empezar a impartise na Escuela Politécnica d’Inxeniería de Xixón (EPI) nel cursu 2018-2019 y va ufrir sólo 60 places per cursu.

Agora, queda que tamién el Conseyu Social de la Universidá y la Dirección Xeneral d’Universidaes dean la so aprobación al grau antes de la preceptiva acreditación per parte de la ANECA.

El vicerrector d’Organización Académica, Juan José del Coz, adelantró que la intención ye que los estudios tengan numerus clausus, lo que llindaría la so matrícula a un máximu de 60 alumnos per cursu. «Ye un grau que se combina colos yá esistentes, colo cual primeru y segundu seríen cursos comunes». Por tanto, esplicó, nel casu de que’l Principáu diera l’aprobación nel cursu 2018-2019, nun sería hasta 2021-2022 cuando realmente los estudiantes cursaríen les materies específiques d’esti grau, yá en terceru.

El director de la EPI, Juan Carlos Riolo, ta convencíu de que’l nuevu grau, que recupera una especialidá técnica que foi impartida con ésitu como inxeniería cimera, va tener una «bona demanda». Tamién destacó la iniciativa del rectoráu nel procesu pa volver ufiertar estos estudios, y faelo nel campus de Xixón, según el consensu total» sobre la necesidá de recuperalos.

El plan d’estudios del nuevu grau, con 240 creitos, preve cuatro cursos académicos con bloques d’asignatures básiques y tecnolóxiques comunes al restu de los graos de la rama industrial y nuevu bloques d’empresa, métodos cuantitativos y xestión de la información qu’inclúin asignatures que van dende ‘Dirección d’empreses industriales’ o la loxística, hasta la Minería de datos’. «Ye un plan d’estudios modernu», valoró Campu.

  Categories: