El Muséu d’Hestoria Urbana acueye una nueva biografía de Dolores Ibárruri ‘Pasionaria’

El Muséu d’Hestoria Urbana d’Avilés acoyía esti xueves la presentación d’una nueva biografía de Dolores Ibárruri. En “Pasionaria. La vida inesperada de Dolores Ibárruri”, Diego Díaz Alonso cunta la so vida al traviés del movimientu obreru y la so llucha feminista.

Nel llibru rellátase cómo una muyer de 1895 de familia católica de Vizcaya llegó a convertise en Pasionaria, iconu mundial de la resistencia antifascista. Coles sos lluces y les sos solombres, Dolores Ibárruri ye una apasionante protagonista del sieglu XX. La obra, editada con motivu del centenariu del Partíu Comunista d’España trata de sopelexar la biografía de Dolores Ibárruri, al traviés d’aspeutos como la capacidá del movimientu obreru na so dómina, el feminismu de la so personalidá y l’influencia del estalinismu.

L’autor Diego Díaz (Uviéu, 1981) ye doctor n’Hestoria pola Universidá d’Uviéu. Participó en diverses obres sobro’l movimientu obreru y antifranquista asturianu y el separatismu catalán. Ye collaborador habitual del diariu El Saltu y director del periódicu dixital Nortes. “Pasionaria. La vida inesperada de Dolores Ibárruri” ta prologada por Enric Xuliana, subdireutor del diariu La Vanguardia.

Dolores Ibárruri pasó de fregar la see socialista local a secretaria del PCE, a espachar con Azaña, Stalin, Mao o Fidel Castro, a ser la única muyer del buró de la Komintern. Y tamién, la pionera de ciertu feminismu socialista nos 30, la madre de la patria mientres la Guerra Civil, la muyer tradicional que dexó al so home y vivió un romance con un collaciu muncho más nuevu, l’almiradora de la URSS que condergó la invasión de Praga o la bolchevique que se convirtió na güela de la Transición. Hai munches vides posibles na vida inesperada de Dolores Ibárruri.