Portada Escéniques El Muséu d’Hestoria Urbana acueye la esposición “Compañía Asturiana de Comedies: 100 años de teatru asturianu”

El Muséu d’Hestoria Urbana acueye la esposición “Compañía Asturiana de Comedies: 100 años de teatru asturianu”

by redacción asturnews

La conceyala de Cultura, Yolanda Alonso, inauguró esti xueves 7  la esposición “Compañía Asturiana de Comedies: 100 años de teatru asturianu”, que va permanecer abierta hasta’l 7 d’agostu na sala d’esposiciones temporales “Antigua Escuela de Cerámica” del Muséu d’Hestoria Urbana d’Avilés. El director y fundador de la compañía, Eladio Sánchez, asistió tamién al actu d’inauguración.

La esposición, producida pola Asociación Cultural Compañía Asturiana de Comedies, ta compuesta por una serie de paneles nos que pueden contemplase numberoses fotografíes antigües, por aciu les cualos el visitante va poder realizar un viaxe al traviés de la hestoria del teatru costumbrista asturianu mientres los últimos cien años. Nomes como los de “Pachín de Melás”, Isidro Carballido o Eladio Verde destaquen como impulsores d’esti xéneru escénicu.

Completen l’amuesa otros materiales como programes de mano, cartelos, distinciones o trofeos, como la Medaya del Conceyu de Xixón, concedida a l’asociación en 2010 como reconocencia a la so trayectoria. Amás, van esponese siete figures representatives d’otros tantos personaxes característicos de la trayectoria escénica de la compañía.

Esta esposición foi entamada por cuenta de una doble efeméride: el centenariu del teatru costumbrista n’Asturies y el 30º aniversariu de l’Asociación Cultural Compañía Asturiana de Comedies. L’Antiguu Institutu de Xixón foi la primer parada d’esta amuesa qu’agora llega a Avilés, y que tres la so estancia na ciudá va siguir el so periplu per Asturies con presencia n’otres localidaes como Candás o Llangréu.

 

Tamién te podria gustar