El Muséu del Pueblu d’Asturies presenta 7 nuevos fondos

El Muséu del Pueblu d’Asturies presenta 7 nuevos fondos
02 avientu 13:42 2015 Imprimir

Esti xueves, a les 12.30 del meudía, van presentase nel muséu siete nuevos fondos fotograficos nuevos, qu’axunten miles de negativos.Unu  de los fondos que va presentase ye’l de Semeya Estudio KARTY, casa de fotografíes del barriu de Pumarín, en Xixón, que funcionó ente 1960 y 1995. Son 62.000 negativos a partir de los cualos puede reconstruyise la hestoria y la vida cotidiana d’esti barriu nesos años. Hai imaxes de too tipu de celebraciones, especialmente de calter familiar y social (cumpleaños, bautizos, comuniones, bodes, bailles, fiestes escolares, deportes, entregues de premios, desfiles de moda, etc), semeyes, cais, cases en construcción y cases vieyes, comercios, etc.

Sigún despliquen nel Facebook del Muséu hai tamién reportaxes encargaos por distintes empreses de la ciudá con fines comerciales o publicitarios. Semeya Estudio Karty taba na cai Aragón. Los sos propietarios fueron: Florentino Moanuz Cuetos (ente 1960 y 1990) y Roberto Canga Vega (ente 1990 y 1995).

El Muséu del Pueblu d’Asturies tamién caltien l’archivu y biblioteca de Patriciu Adúriz (escritor y cronista oficial de Xixón dende 1982 hasta la so muerte en 1992), que contien una gran variedá documental: llibros, revistes, catálogos, retayos de periódicos, cartes, manuscritos, partitures, etc. Inclúi amás un bon númberu de fotografíes de gran diversidá (tocantes a la so temática, procedencia, calidá y autoría) atropaes por Adúriz nel so enfotu de recoyer y coleccionar tou lo que tuviera que ver con Asturies y en particular con Xixón. Especial interés tienen 86 negativos de acetato que fueron realizaos pol suegru de Adúriz, José Manuel Lorenzo Fernández (Xixón, 1892-1962) que contienen imaxes de Xixón de los años venti y trenta del sieglu pasáu.

Toes eses imaxes integren yá’l fondu fotográficu Patriciu Adúriz, que ye otru de los siete que van presentar al públicu’l xueves 3 d’avientu.

Loading Facebook Comments ...