El Muséu del Pueblu d’Asturies participa nel festival de fotografía REVELA-T

22 mayu 10:50 2017 Imprimir

El Muséu del Pueblu d’Asturies va participar nel festival de fotografía analóxica más importante del mundu, REVELA-T, con una esposición de fotografía post-mortem.

«Hidden» (ocultu) ye la tema común de les cincuenta esposiciones que s’integren en Revela-T, el festival de fotografía analóxica más importante del mundu qu’esta fin de selmana pasada abriera les sos puertes en Vilassar de Dalt (Barcelona), y que se va enllargar hasta’l 28 de mayu con una nutrida gama d’actividaes complementaries (espectáculos, proyecciones, talleres, charres, alcuentros, intercambios artísticos, propuestes lúdiques,…).

El Muséu del Pueblu d’Asturies apurre a esti festival una esposición de fotografía mortuoria, escoyida ente la so estensa colección de semeyes de difuntos. Van amosase obres de distintes dómines y de cinco fotógrafos asturianos: Juan Evanxelista Canellada, Benjamín Rodríguez Membiela, Emilio Alonso, Enrique Gómez y Valentín Vega.

Fotografíar difuntos foi una costume que s’estendió poco dempués de la nacencia mesmo de la fotografía. La práctica consistía en vistir el cadabre d’un muertu coles sos propies ropes y realiza-y una última semeya, en solitariu o arrodiáu de la so familia o amigos. Nun principiu la fotografía mortuoria nun yera considerada morbosa, por cuenta d’una visión romántica de la vida y la muerte.

Prueba de lo estendío d’esta práctica ye’l fechu de que, a pesar de que munches de les fotografíes integraes nesta colección son anónimes, abondando los fotógrafos profesionales que lu practicaron. Los nuevos trabayos d’investigación y la formación de colecciones fotográfiques como la del Muséu del Pueblu d’Asturies amuesen qu’esti xéneru algamó un gran desenvolvimientu n’España ya Italia en toles clases sociales y mientres un llargu periodu de tiempu, que s’enllarga hasta los años sesenta del sieglu XX.

  Categories:
Loading Facebook Comments ...