El Muséu de la Hestoria Urbana d’Avilés recibe una maqueta del Conceyu de 1929

El Muséu de la Hestoria Urbana d’Avilés recibe una maqueta del Conceyu de 1929
25 abril 09:45 2018 Imprimir

Esti miércoles a les 12 hores nel Muséu nun actu presidíu por Yolanda Alonso, conceyala de Cultura, el Muséu de la Hestoria Urbana d’Avilés recibe una maqueta del Conceyu que data de 1929.

Esti miércoles 25 d’abril, a les 12 del mediudía nel Muséu de la Hestoria Urbana, va tener  llugar l’actu de cesión d’una singular maqueta del edificiu consistorial d’Avilés realizada en 1929. Obra del lleonés afincáu n’Avilés José Alonso Zalamín, amuesa con fidelidá l’estáu del edificiu antes de la so restauración tres los bombardeos de la Guerra Civil. Ufiértala la familia del autor, encabezada pola so fía, Flor Alonso Menéndez, nun actu presidíu por Yolanda Alonso, concejala de Cultura d’Avilés. Tratase d’una donación totalmente desinteresada de la familia de José Alonso Zalamín y va pasar a formar parte de los fondos del muséu, como un elementu a destacar na Villa Moderna”, qu’una vegada superáu les llendes de la cerca medieval al traviés de Galiana y Sabugo configura los primeros arrabaldes que tienen al actual Parche como exa vertebrador.

La maqueta ye obra José Alonso Zalamín, un lleonés afincáu n’Avilés y que a los dieciséis años realizó una copia esacta del edificiu del Conceyu cola configuración qu’entós tenía. Non solo tamos ante una obra de gran calidá artística, a pesar de la mocedá del autor, con una reproducción esacta del edificiu, sinón que tien un valor históricu importante una y bones nos amuesa l’estáu del conceyu avilesín con anterioridá a la reconstrucción realizada tres los bombardeos de la Guerra Civil. Esta obra de rehabilitación foi proyectada por Enrique Rodríguez Bustelo, l’arquiteutu de Noreña qu’enantes diseñara l’Institutu Carreño Miranda, anguaño Colexu Públicu Palacio Valdés, na Avenida de Portugal.

Ente les singularidaes de la obra d’Alonso Zalamín atopamos en primer llugar la esistencia de comercios de texíos nos baxos del llau esquierdu del Conceyu y tamién la torre-campanariu, más atrasada que nel so estáu actual. Otru elementu interesante ye la esistencia d’un focu que frontalmente allumaba’l reló municipal.

  Categories: