El Muséu de la Hestoria Urbana d’Avilés prorroga la esposición “Valderredible”

El Muséu de la Hestoria Urbana d’Avilés prorroga la esposición “Valderredible”
14 setiembre 08:45 2020 Imprimir

El Muséu de la Hestoria Urbana d’Avilés prorroga la esposición “Valderredible: valle del rupestre” que puede visitase hasta’l 12 d’ochobre, con accesu llibre y gratuitu. Inaugurada’l 10 de xunetu, cuntó con una gran aceptación per parte de los y les visitantes. Recueye una amuesa del importante patrimoniu rupestre que tien esti conceyu cántabru con venceyos con Avilés.

El Muséu de la Hestoria Urbana d’Avilés prorrogó hasta’l 12 d’ochobre la esposición “Valderredible: Valle del Rupestre”, inaugurada’l pasáu 10 de xunetu y que la so finalización taba prevista para’l 30 d’agostu. La gran aceptación de l’amuesa per parte de los y les visitantes al MHUA motivó esta ampliación.

Valderredible ye un conceyu del sur de Cantabria, asitiáu na contorna de Campoo-Los Valles, que cunta con un singular conxuntu d’ilesies, eremitorios, cueves artificiales y enterramientos rupestres que lo converten nun llugar únicu, el más importante d’Europa.

Destaquen nel so patrimoniu xoyes rupestres como Santa María de Valverde, San Miguel de Presillas de Bricia o’l denomináu Tobazo en Villaescusa de Ebro. Monumentos que dende’l sieglu VIII constaten la presencia humana neses tierres, venceyaes a la nacencia de la llingua castellana.

Esta amuesa, producida pol Conceyu del Real Valle de Valderredible, llegó per primer vegada a Asturies dempués de pasar per Madrid y Cantabria, y tien por oxetu amosar esta xoya patrimonial al empar cercana y desconocida.

Valderredible tien, coles mesmes, un importante patrimoniu románicu, cola ilesia-colexata de San Martín de Elines, y paisaxísticu, como les cascaes d’El Tobado, el monte Hijedo y tola ribera del Ebro (que da nome al conceyu). Y caltien estrechos llazos con Avilés, onde s’asitió una importante comunidá valluca (este ye’l so xentiliciu), fai 70 años, cola instalación de Cristalería Española y ENSIDESA na ciudá.

La esposición va permanecer abierta hasta’l 12 d’ochobre, y podrá visitase nos horarios habituales del muséu: de martes a vienres, de 10.30 a 13.30 y de 16.00 a 20.00 hores; los sábados, de 11.00 a 13.30 y de 16.00 a 20.00 hores, y los domingos y festivos, de 11.00 a 13.30 hores. L’accesu ye llibre y gratuitu.

  Categories: