El Muséu de la Hestoria d’Avilés recuerda la llucha contra la dictadura na esposición “Antifranquismo y Prensa”

El Muséu de la Hestoria d’Avilés recuerda la llucha contra la dictadura na esposición “Antifranquismo y Prensa” que va caltenese abierta dende esta selmana hasta l’entamu de setiembre.

Del 5 de xunetu al 2 de setiembre espón 60 paneles que recueyen cabeceres y noticies de la prensa española na clandestinidá y nel esiliu, con amplia presencia d’Asturies. Ta entamada pola conceyalía de Cultura d’Avilés cola collaboración de la Fundación José Barreiro

El Muséu de la Hestoria Urbana d’Avilés acueye una nueva esposición. Esti xueves 5 de xunetu, inaugurábase “Antifranquismo y Prensa”, una amuesa qu’avera al públicu cabeceres y noticies de los medios de comunicación españoles que dende la clandestinidá, o nel esiliu, dieron voz a la oposición a la dictadura.

Entamada pola conceyalía de Cultura d’Avilés, en collaboración cola Fundación José Barreiro, l’actu d’apertura, que cuntó cola participación de Yolanda Alonso, conceyala de Cultura del Conceyu d’Avilés, tuvo llugar el xueves a les 12 hores na sala d’esposiciones temporales del Muséu.

Pa poner en marcha la esposición túvose accesu al ampliu fondu documental qu’atesora la Fundación José Barreiro. El so director, Adolfo Fernández Pérez, que tamién va tar presente nel actu d’inauguración, ye’l  coordinador de la mesma, ente que María Teresa Montero Apuertes ye la documentalista.

En 60 setos, recuéyense cabeceres y noticies de la prensa española na clandestinidá y l’esiliu a lo llargo de les cuatro décades de dictadura franquista, ufiertando una imaxe de la realidá qu’en nada se paecía a la de la España oficial que conformaben los medios del réxime, sometíos a la censura.

Estes cabeceres amuesen la resistencia, la llucha obrera, l’actividá de les organizaciones sindicales clandestines, la represión, rellaciones Iglesia-Estáu, el papel de la muyer ya inclusive necrolóxiques sobro líderes políticos. “Un estraordinariu reflexu de cuarenta años de vida y de comunicación na España non oficial”, en palabres de el organizadores de l’amuesa. Retrata cómo les organizaciones políticu y sindical clandestines traten de, dende España y dende l’esiliu, combatir el cercu de silenciu y de falta de llibertá de la dictadura.

La esposición, con un ampliu percorríu pola xeografía asturiana, dexa l’accesu a documentos d’escepcional valor históricu: prensa fecha n’España; periódicos editaos en Francia, Bélxica, Cuba, Arxentina o Arxelia; órganos de partíos y sindicatos, como’l PSOE, PCE, UXT, CNT, según organizaciones republicanes y nacionalistes.

La esposición va tar abierta hasta’l 2 de setiembre, y podrá visitase de forma llibre y gratuita nos horarios habituales del Muséu: de llunes a vienres, de 10.30 a 13.30 hores y de 16 a 20 hores; los sábados, de 11 a 13.30 y de 16 a 20 hores, y los domingos y festivos, de 11 a 13.30 hores.