El Muséu de la Gaita amuesa preseos d’Europa oriental

El Muséu de la Gaita amuesa preseos d’Europa oriental
06 febreru 11:51 2020 Imprimir

Dende 1966, el Muséu de la Gaita vieno formando una colección internacional de gaites que dexa al visitante asitiar la gaita asturiana nes sos verdaderes coordenaes culturales, alcontraes nun gran territoriu qu’arrodia’l Mediterráneu y estiéndese dende Irlanda hasta la India, y agora instalose na recepción una vitrina na que preséntense delles pieces procedentes del oriente d’Europa.

Pal públicu asturianu, unu de los espacios musicales menos familiares ye l’oriente d’Europa, con riques tradiciones qu’entienden una gran diversidá de preseos musicales, ente ellos gaites bien variaes nes sos formes y soluciones técniques. Precisamente por esta variedá, que se manifiesta nel númberu y allugamientu de los sos tubos, les sos escales musicales, el so soníu y la so decoración, los preseos del oriente européu tienen xuna intensa personalidá y resúltennos bien llamativos.

Pa dar a conocer al públicu les últimes alquisiciones musicales del muséu, instalose na recepción una vitrina na que preséntense delles pieces procedentes del oriente d’Europa. Tratase d’una gaida y un kaval de Bulgaria, un mih de Bosnia y Hercegovina, y xuna caraba o punteru de gaita de Rumanía.

La gaita búlgara que s’espón nesta vitrina se corrsspóndese col modelu denomináu dzhurá gaida o “gaita aguda” (n’Asturies podría traducise como “gaita grillera”). Ta estendida por toa Bulgaria, onde acompaña’l cantar y les dances populares, sola o con otros preseos como’l kaval que figura al pie de ella na vitrina. El kaval ye xuna flauta bien popular en tol país que se fai cola madera del “drian” o escuernacabres machu y tien de tratase dacuando con aceite d’oliva pa caltener les sos propiedaes y la so sonoridá. La so técnica ye desaxeradamente complexa y rique muncho entrenamientu.

La caraba lléganos de la provincia rumana de Vrancea, onde vive unu de los postreros constructores rumanos de gaites, el maestru Ion Stanciu, que nos unvió esta caraba xuntu con un cimpoi o gaita rumana qu’él mesmu fixo pal muséu y qu’anguaño s’atopa espuesta na Sala Internacional de Gaites. La caraba ye, en realidá, el punteru de la gaita fechu a navaya, furáu con un fierro ingriente y preparao pa poder tocalo ensin el fuelle. Les técniques de fabricación de la gaita na Rumanía rural malapenes camudaron.

A lo último, el mih qu’incorporen nesta vitrina ye una gaita procedente de Bosnia y Herzegovina que, a empiezos del sieglu XIX, foi llevada a Estaos Xuníos pol so propietariu, un gaiteru emigrante que, al morrer, dexar n’heriedu al so fíu. Un sieglu dempués, la pieza foi vendida nuna puya público y adquirío por José Benito Nava Monroy, un gaiteru mexicanu d’orixe asturianu que la donó al Muséu de la Gaita, onde güei se curia.

Estes pieces van incorporase nun futuru próximu a la esposición permanente, completando la nuesa conocencia sobro esti peculiar y fascinante mundu sonoru.

  Categories: