El mundu de la cultura asturiana despide a Mánfer de la Llera en Xixón con un cálidu y unánime respetu

Una emocionante ceremonia civil d’alcordanza y homenaxe celebráu na capiella del tanatoriu de Xixón valió pa despidir al escritor y académicu asturianu Manuel d’Andrés Fernández, Mánfer de la Llera, arrodiáu de los suyos y d’una sinfinidá de xente que quiso acompañar cola so presencia silenciosa al patriarca de les lletres asturianes nel so últimu actu públicu. Talo-y sucediera en vida, la figura de Mánfer, llogró xuntar alrodiu suyu y de la so memoria, el respetu unánime de tolos que compartieron con él los mesmos ideales por un mundu más xustu y una Asturies arguyosa de la so propia identidá.

La capiella del tanatoriu de Cabueñes, en Xixón, quedó pequeña pa tola xente que quiso tar ende arropiellando a los familiares del poeta Mánfer de la Llera na ceremonia civil de despidida a un home que supo ganar la consideranza más fonda de tolos que lu conocieron y que significó a lo llargo de tola so vida un referente moral na llucha poles llibertaes mientres la dictadura franquista y dende la so incorporación enfotada al proyectu cívicu entamáu por Conceyu Bable pa la recuperación de la identidá cultural asturiana, un exemplu de compromisu col movimientu en defensa de los derechos llingüísticos y nacionales del so pueblu.

El compromisu activu de Mánfer de la Llera cola realidá que-y tocaba más cerca y cola llucha por un futuru posible pa la so tierra quiso recordalo la voz emocionada d’Amelia Varcárcel na so intervención nel actu d’homenaxe cuando afirmó que’l so antigu compañeru de Conceyu Bable “sabía que tenía una patria y esa patria tenía’l nome d’Asturies”. La filósofa, que precedió nel cargu de presidenta de C.B. a Mánfer, evocó l’exemplu moral y vital d’un home “al que-y tocó vivir nun tiempu nel que non toos teníen accesu a los estudios por cuenta de la so condición social y onde tampoco abultaba compatible l’estudiu col trabayu d’un obreru”. De la coincidencia del escritor llangreanu colos mozos universitarios qu’entamaron Conceyu Bable, Varcárcel, acudiendo a la so memoria personal, amosó la so convición en que la presencia de Mánfer aportaba “una profundidá nel tiempu, un sentíu hestóricu a aquel movimientu d’unos cuantos ‘rapazucos’, como nos llamó ciertu mediu entós”. Amelia Varcárcel, visiblemente emocionada, robró la so intervención col deséu de que l’alcordanza del escritor desapaecíu valga pa remembrar que “namás vivimos pa dexar de nós un poco de memoria, porque’l tiempu somos nós”.

Numberoses persones del ámbitu de la vida pública asturiana, ente elles podía vese a los conseyeros de Xusticia y Esteriores Francisco Javier García Valledor y d’Educación, José Luis Iglesias Rioperdre; los directores xenerales de Cultura, Carlos Madera y de Prevención y Seguridá nel Trabayu, José Couto; el director del centru territorial de RTVE n’Asturies, Pedro Alberto Marcos;la conceyal de Llingua y Cultura asturianes de Xixón, Carmen Rúa; el secretariu xeneral del Bloque por Asturies, Roberto Colunga; el presidente del PAS, Xuan Xosé Sánchez Vicente o el conceyal d’URAS en Villaviciosa, Xicu Díaz Yepes. Del ámbitu de la cultura y el mundu académicu, podía vese, a escritores como Lourdes Álvarez, Taresa Lorences, Xandru Fernández, Xosé Bolado, Antón García o Humberto González; los académicos Miguel Ramos Corrada y Urbano Rodríguez, el presidente del Foru Xovellanos, Jesús Menéndez Pelaez, ente otres figures destacaes.

Ente la xente del mundu de la cultura asturiana el respetu y la consideranza a la personalidá de Mánfer

yera unánime, asina afirmaba Chema Vega, compañeru del escritor fallecíu na tertulia El Garrapiellu: “Mánfer yera sobre too un paisanu, nel sentíu que tien esa palabra n’asturianu, un home íntegru, bonu, paisanu de los pies a la cabeza”. L’actor Lluis Antón González, compañeru de Mánfer de la Llera en Conceyu Bable, destacaba que “yera un home que concitaba nél el respetu de tolos que lu conocíen, siempre tuvo alloñáu de cualquier tipu d’enfrentamientu o dixebra, per enriba de cualquier engarradiella”. Al so llau el realizador Ramón Lluis Bande señalaba que “Mánfer supo xuntar la cultura popular con formes de creación modernes, a la vez qu’él mesmu facía de ponte ente la so xeneración y les más nueves, na so faceta como creador yo destacaría esa manera tan moderna de xunir tradición y cultura populares cola so lliteratura de calter documental o testimonial”. El críticu Leopoldo Sánchez Torre coincidía na valoración de la figura de Mánfer de la Llera como “ponte ente les xeneraciones lliteraries, nesi sen el so papel foi fundamental y la so personalidá una referencia importante”.

Na ceremonia pudieron escuchase nes voces del Coru del Llano, canciones populares como “El Chalaneru” o “Si la nieve resbala”, que teníen un significáu especial pa Mánfer, y el poeta Xuan Santori y el músicu Toli Morilla lleeron dalgunos poemes que’l propiu autor escoyera pa cuando llegara esi momentu, según cuntó l’escritor Vicente García Oliva, oficiante laicu del actu tamién por deséu de Mánfer de la Llera: “él yera consciente de qu’esi momentu podía llegar y quiso dexalo too preparao, quería que lu despidiéramos asina”. Unes emocionantes palabres d’Amelia Varcárcel valieron pa evocar la personalidá moral y vital del escritor llangreanu. Nelles Varcárcel recordó los díes de la so mocedá cuando coincidió con otros compañeros de xeneración en Conceyu Bable y onde s’atoparon con Mánfer de la Llera, “un home de cierta edá que pa nós entós, malpenes ‘unos rapazacos'(como nos llamó dalguién nun periódicu de la época), y la presencia de Mánfer daba al nuestru proyectu profundidá nel tiempu”. Con voz emocionada Amelia Varcárcel acabó les sos palabres evocando la estela de lluz que dexaba el poeta llangreanu y afirmó “qu’a poco más podemos aspirar a nun ser dexar daqué de nós nel tiempu, porque somos memoria”.