Portada Educación El ministeriu pide a la Universidá qu’acabe’l cursu en plazu y con evaluación ‘on line’

El ministeriu pide a la Universidá qu’acabe’l cursu en plazu y con evaluación ‘on line’

by redacción asturnews
Foto: Hugo Pardo Kuklinsk (https://www.flickr.com/photos/18016623@N00/)

El Ministeriu d’Universidaes vieno acabante pidir la selmana pasada a la Universidá qu’acabe’l cursu en plazu y con evaluación ‘on line’. Solicita «unos criterios xenerales» pa les pruebes telemátiques, que s’espublicen con tiempu y puedan ser asumíos polos alumnos.

Cada universidá, nel exerciciu de la so autonomía y en coordinación la so comunidá autónoma, va desenvolver los procedimientos necesarios para terminar el cursu nos plazos establecíos, incluyendo docencia y evaluación. Asina se decidió la selmana pasada na Conferencia Xeneral de Política Universitaria, qu’axuntó al ministru d’Universidaes, Manuel Castells, y a los representantes autonómicos del ramu y na que se definieron les llínees xenerales del zarru del cursu 2019-2020.

Nun comunicáu, el Ministeriu d’Universidaes detalla que cada centru tendrá de tomar les sos midíes «consultando col conxuntu de la comunidá universitaria y anunciando lo más llueu dichos procedimientos al conxuntu del personal docente, estudiantáu y personal llaboral de cada universidá». Nesti sentíu, les facultaes de la institución académica asturiana, tienen de plazu hasta’l día 20 pa treslladar les sos preferencies sobro una evaluación presencial o ‘on line’.

Sicasí, p’aquelles asignatures que la so evaluación ye fundamental o totalmente práctica, como por casu dalgunes del grau de Ciencies de l’Actividá Física y el Deporte o graos o másters que rican l’usu de llaboratorios, aconseya valorar opciones alternatives non presenciales d’evaluación.

Nesti sentíu, apúntase que nel casu de camudar la situación de confinamientu y les midíes sanitaries escepcionales mientres esti cursu académicu, les evaluaciones podríen realizase presencialmente con posterioridá a les feches d’evaluación establecíes hasta agora.Sía que non, estos cambeos nel sistema d’evaluación de les asignatures o materies que configuren el plan d’estudios de cada titulación oficial, tendría d’asegurase que cualquier propuesta que s’apurra pueda tecnológicamente ser asumida por tol estudiantáu.

 

Tamién te podria gustar