El Ministeriu de Fomentu promociona la toponimia con una campaña n’asturianu

13 abril 04:25 2010 Imprimir

El Ministeriu de Fomentu, al traviés de la Comisión Especializada de Nomes Xeográficos (CENG), integrada nel Conseyu Superior Xeográficu, desenrrolla una campaña estatal de promoción de la toponimia, que n’Asturies cunta cola collaboración de la Conseyería de Cultura y Turismu. Asturies, al encruz de la so Dirección Xeneral de Política Llingüística, fai parte d’esta Comisión dende l’añu 2008. Esta campaña xeneral axúntase d’esta manera a les distintes iniciatives del Gobiernu asturianu d’investigación y promoción de la toponimia tradicional.

Con motivu d’esta campaña, el Ministeriu editó’l folletu informativu “Importancia de los nomes xeográficos y necesidá del so usu normalizáu”, con una versión xeneral en castellanu y con versiones nel restu de llingües del Estáu, cuando oficiales –catalán, gallegu y euskera- cuando protexíes polos sos estatutos –casu del asturianu-, a la que se refier xunto col aragonés y el “leonés”, como “otres llingües y dialectos”.

Nel casu d’Asturies, la Dirección Xeneral de Política Llingüística collaboró na redacción n’asturianu y la difusión nos distintos ámbitos y instituciones de dichu material informativo. Nél pue alcontrase información de la propia Comisión Especializada de Nombres Geográficos, del valir de los propios nomes xeográficos, de porqué la so normalización ye necesaria, a quién correspuende desenvolver dicha normalización, qué beneficios aporta, cómo dicha normalización tien que s’adaptar a les distintes llingües o variedaes falaes n’España…

Dende Política Llingüística recuerden que los procesos de normalización y oficialización toponímica son comunes al conxuntu d’España y tienen que ver col desenrrollu de les instituciones democrátiques nel nuestru país y la consideración creciente de la toponimia como parte del patrimoniu cultural inmaterial, conforme reconoció la ONU na so resolución IX/4, del añu 2007. N’Asturies emprimaron los trabayos de normalización toponímica nel añu 2004, col desarrollu de la Xunta Asesora de Toponimia y l’apertura d’espedientes d’oficialización toponímica en dellos ayuntamientos.

Folletu informativu del Ministeriu de Fomentu (ast)

  Categories:
Loading Facebook Comments ...