El mercáu editorial consolida la so recuperación y xorrez per tercer añu

El mercáu editorial consolida la so recuperación y xorrez per tercer añu
21 xunetu 08:58 2017 Imprimir

El mercáu editorial español consolidó la so recuperación y xorreció per tercer añu consecutivu, con un aumentu del 2,7 % en 2016, hasta los 2.317,20 millones d’euros, al que contribuyó una medría más equilibrada de les vientes en tolos xéneros lliterarios.

“Queda un trechu llargu p’algamar les cifres d’antes de la crisis -en 2008 creció un 30,8 % más-, pero esa cierta recuperación del añu pasáu agora ye una recuperación cierta y consolidóse”, aseguró esta selmana demientres la presentación del so informe añal el presidente de la Federación de Gremios d’Editores d’España y de l’Asociación de Cámares del Llibru d’España, Daniel Fernández.

Según los datos del “Analís del Mercáu Editorial n’España: Comerciu Interior y Esterior”, editáronse 81.496 títulos, con una tirada media de 2.749 exemplares por caúnu, y el catálogu editorial español en comercialización yá ye de 620.316 llibros, con un preciu mediu de 14,74 euros. Nesti sentíu, Fernández espresó que magar que tán “más esperanzaos” tampoco dexen de ser “reivindicativos” yá que hai aspeutos que los afecten directamente como la piratería y quixo dexa afitao que esperen “que se refuerce la sección II de la Comisión de Propiedá Intelectual pa lluchar contra la piratería. Reconocemos pasos y progresos que nos faen creer que dempués d’enforma tiempu semando tamos cerca del tiempu de la collecha”.

La meyora sofitose esta vegada nuna medría más equilibrada de les vientes de tolos xéneros, especialmente los lliterarios, tanto d’adultos como infantil y xuvenil, y de los llibros de testu, de resultes de la renovación de segundu y cuartu de Secundaria establecida nel calendariu d’implantación de la Lomce. Anque Fernández esplicó que pa llegar a les cifres d’antes de la crisis tendríen de producise” dellos cambeos como la recuperación de la compra del llibru” poles alministraciones públiques; según “consiguir racionalizar la política de gratuidá de los llibros de testu”. “Les biblioteques públiques nun tán mercando llibros”, criticó.

Según l’estudiu, en 2016 había 727 empreses privaes y axermandaes, un 7,6 % menos qu’en 2015; empreses que la so concentración ye “moderada”, anque ente Madrid y Barcelona algamen el 93 % del mercáu. Tocantes a les esportaciones del sector del llibru, éstes algamaron 571,77 millones d’euros, con una medría del 3,5 %, y la balanza comercial del sector da un saldu positivu de 370,45 millones d’euros, un 14,2 % más qu’en 2015.

Tocante a les llibreríes y cadenes de llibreríes, éstes siguen siendo les principales canales de distribución del llibru, y tolos canales ven xorrecer les cifres de vienta sacante la vienta per corréu. Pela so parte, el llibru editáu en formatu dixital facturó 117,19 millones d’euros, un 1,5 % más qu’en 2015, lo que trasluce “la ralentización detectada a escala global nes vientes d’esti formatu.

  Categories: