Portada Música El Low Festival va acoyer l’únicu conciertu n’España de Franz Ferdinand en 2017

El Low Festival va acoyer l’únicu conciertu n’España de Franz Ferdinand en 2017

by redacción asturnews
Foto: Liliane Callegari (https://www.flickr.com/photos/lilianecallegari/)

Low Festival anunció nuna nota de prensa, que la so próxima edición, que va tener llugar del 28 al 30 de xunetu, va cuntar col únicu conciertu n’España en 2017 de Franz Ferdinand, tres años dempués del últimu conciertu de los británicos nesti país.

La confirmación de la banda de Glasgow ye la segunda tres la de Pixies, nun movimientu col que los organizadores de la cita musical de Benidorm (Alicante) aspiren a que’l próximu sía un “GiganticLow”, esto ye “la meyor edición del festival hasta la fecha”.

Con dos premios Brit y tres millones d’álbumes vendíos de los sos cuatro discos nel mercáu, Franz Ferdinand ye una de les bandes de rock alternativa más importantes de l’actualidá, con Alex Kapranos (voz y guitarra), Bob Hardy (baxu) y Paul Thomson (batería) al mandu de la mesma. Apocayá anuncióse que Nick McCarthy (guitarra y teclaos) nun va participar d’esta xira nin nel quintu álbum d’estudiu del grupu p’atender asuntos familiares.

El postreru gran proyectu musical nel que se vieron somorguiaos los miembros de Franz Ferdinand foi la so fusión cola tamién conocida banda estadounidense Sparks so les sigles FFS, resultáu de la cual publicóse un discu homónimu en 2015 col que visitaron el festival de Benicàssim d’esi añu.

Tamién te podria gustar