El IV Festival de Poesía n’Asturianu de Xixón celébrase esta tarde con una llectura acompañada de la música de Mus

Redacción.

Como cada añu per estes feches, va celebrase’l Festival de Poesía n’Asturianu de Xixón nel Centru Municipal de L’Arena con una llectura musicada, esti añu pol grupu Mus. El Festival quier ser un momentu pa esparder el conocimientu de la nuesa poesía y de los autores asturianos.

Esti añu los seleicionaos pa participar son Miguel Rojo, Humberto González, Chechu García y Ana Vanessa Gutierrez, axuntando asina a poetes con una llarga trayeutoria, como son Rojo y González con otros más mozos. El recital entama a les 19:30 hores nel Salón d’Actos del Centru Municipal de L’Arena.

L’actu va tener continuidá mañana sábadu a les 11 la mañana na Playa L’Arbeyal, cuando estos y otros poetes van facer una suelta de globos con poemes, xunto a los rapazos del Grupu Scout d’El Natahoyo. La organización d’estes actividaes cuerre a cargu d’Aurora García Rivas, Armando Vega y Ricardo Candás.