El IES Carreño Miranda premiáu nel concursu nacional “Propuestes innovadores a retos d’Europa 2020”

El IES Carreño Miranda premiáu nel concursu nacional “Propuestes innovadores a retos d’Europa 2020”
11 avientu 10:44 2018 Imprimir

El IES Carreño Miranda vieno acabante ser premiáu nel concursu nacional “Propuestes innovadores a retos d’Europa 2020”. Dos alumnes del centru avilesín representaron a Avilés nel “Talent Woman” celebráu en Málaga, cola collaboración del Parque Científico y Tecnolóxico Avilés “Isla de la Innovación” dientro del programa Ciencia y Tecnoloxía en Femenín.

Dos alumnes del IES Carreño Miranda representaron a Avilés nel Talent Woman, el mayor eventu de talentu femenino en ciencia y tecnoloxía d’España, celebráu en Málaga. Allegaron en representación del equipu d’institutu avilesín, bautizáu como Kiwazo, integráu por 4 alumnes y 2 alumnos y cola collaboración del Parque Científico y Tecnolóxico Avilés Isla de la Innovación. Ellí recoyeron el segundu premiu del concursu nacional “Propuesta innovadora a retos d’Europa 2020″ pola so propuesta para evitar la contaminación de plásticos nes sableres.

Talent Woman ye un foru d’inspiración, desenvolvimientu y contribución a la visibilización de les muyeres en ciencia y tecnoloxía. Concentra en dos díes charres, meses redondes, talleres y actividaes que contribuyan a amplificar la voz y el trabayu de les muyeres nos distintos ámbitos STEM.

Dieciocho parques de l’Asociación de Parques Científicos y Tecnolóxicos d’España (APTE) diéronse cita nel mayor eventu de talentu femenín en ciencia y tecnoloxía para promocionar les vocaciones STEM y averar el llabor de los parques a los más nuevos.

Esti gran eventu bautizáu como Talent Woman foi entamáu per primer vegada n’España, concretamente na ciudá de Málaga, de la mano de FYCMA (Palaciu de Feries y Congresos de Málaga) y Talent Network y consiguió axuntar a más de 6.000 asistentes. APTE cola so iniciativa Ciencia y Tecnoloxía en Femenín participó como convidáu especial al traviés de trés actividaes: la esposición “Muyeres que camudaron el mundu”, 3 speaker corners y la mesa redonda: “La promoción de les vocaciones tecnolóxiques nos parques científicu y tecnolóxicu”.

Premios

L’actividá remató cola entrega del premiu del concursu Propuestes innovadores a retos d’Europa 2020, que foi parar al grupu d’alumnos del IES Zaidín Vergeles en collaboración col PTS Granada pola propuesta “WELY, asistente de voz para la tercer edá”.

En segundu llugar asitióse l’equipu del IES Carreño Miranda en collaboración col Parque Científico y Tecnolóxico d’Avilés. Y la tercer posición recayó nel Colexu Carmelites Sagráu Corazón en collaboración col Parque Tecnolóxicu d’Álava, pola so propuesta “Domos”.