El Guggenheim vive’l meyor añu de la so hestoria

by redacción asturnews | enero 4, 2018 12:06 pm

El Muséu Guggenheim vivió nel 2017 el meyor añu de la so hestoria, na conmemoración del so XX aniversariu, recibiendo la visita de 1.322.611 persones.

La pinacoteca bilbaina recibió en 2017 1.322.611 persones, lo que supon una medría del 13 % con al respective de 2016. El récord de visitantes supera la marca de 1998, primer añu completu del Muséu, nel que la notoriedá mediática foi estraordinaria.

Pal muséu, esti datu amuesa la sostenibilidá del so ésitu y la so capacidá tractora pal territoriu. Amás, más de 300.000 persones esfrutaron en vivo del espectáculu ‘Reflections’, pol que l’edificiu de Frank Gehry convirtiose cuatro nueches nun llenzu pa lluces, nun actu gratuitu con motivu del aniversariu del centru.

Los 1.322.611 visitantes son 153.207 visitantes más qu’en 2016, y 15.411 visitantes más qu’en 1998, que constituyía l’añu más esitosu hasta la fecha. Teniendo en cuenta’l so orixe xeográficu, caltiense como n’años anteriores l’altu porcentaxe d’estranxeros (62 % del total), procedentes fundamentalmente de Francia (16 %), Gran Bretaña (7 %), Alemaña (5 %), Estaos Xuníos (5 %) ya Italia (4 %).

El públicu procedente del País Vascu asitiase nel 21 %, lo que supon un 10 % más que l’añu anterior,  ente que’l porcentaxe de visitantes del restu del Estáu ye del 17 %. Nesti apartáu destaca la iniciativa ‘Apertura al Territoriu’ promovida pola Diputación de Bizkaia, pola que los vizcainos mayores d’edá recibieron una invitación pa visitar el Muséu de forma gratuita mientres el mes d’ochobre, que 113.966 aprovecharon.

L’amuesa más esitosa en 2017 foi la retrospectiva de Bill Viola, vista por 710.995 persones ente xunetu y ochobre, que tuvo la segunda meyor media diaria de visitantes na hestoria del Muséu, solo superada pola de ‘China: 5.000 años’, en 1998. ‘París Fin de Sieglu. Signac, Redon, Toulouse-Lautrec y los sos contemporaneos’, foi esfrutada por 569.673 persones ente mayu y setiembre, y ‘George Baselitz: Los héroes’, coincidente nel tiempu con Bill Viola, foi visitada por 534.221 persones ente mediaos de xunetu y ochobre.

Per otra parte, el muséu calculó l’impactu económicu qu’el so funcionamientu xenera na redolada y que foi de 495,5 millones. L’aportación al PIB foi de 433,7 millones, xeneraron unos ingresos adicionales pa les Faciendes vasques de 67,2 millones y l’actividá del Muséu contribuyó al caltenimientu de 9.282 empleos. El nivel de autofinanciación en 2017 asitióse en redol al 70 %.

Source URL: http://asturnews.com/el-guggenheim-vivel-meyor-anu-de-la-so-hestoria/