El Grupu San Félix y el 33 Troféu Mac Crimmon abren la presencia asturiana en Lorient

04 agostu 11:24 2018 Imprimir

Esti vienres, 3 d’agostu, entamó’l 48 Festival Intercélticu de Lorient que va desenvolvese hast’l 12 d’agostu y que tien al grupu de Baille San Félix de Candás y les Bandes de Gaites de Villaviciosa y El Gumial como representantes cimeros. El Grupu candansín estrena güei la participación asturiana a les 3 de la tarde xunto a los cuatro gaiteros que compiten pel Mac Crimmon de Gaita.

El 33 Troféu Intercélticu pa solistes de Gaita Mac Crimmon que ye como agora se llama’l tradicional Macallan, va xuntar compitiendo nel Palaciu de Congresos de Loriente, dende les 14,30 hores a cuatro gaiteros asturianos, tres gallegos y una gallega que van dir actuando alternando y presentando una suite caún d’ellos na que s’entemecen composiciones asturianes, gallegues y bretones. La presencia femenina d’esti añu dende Galicia vien a amosar que la presencia de la bretona Marie Le Cam en 2007 y l’asturiana Andrea Joglar, que ganara en 2010, nun van quedar como daqué testimonial na hestoria del concursu.

El concursu, que dura cásique tres hores, va entamar cola actuación del asturianu Jaime Álvarez Fernández, que fora’l ganador na edición de 2017, al que van siguir el gallegu Xesús Rodríguez Callejón, l’asturianu Javier menéndez González, el gallegu Manuel Ramón Seoane Sánchez,  l’asturianu Fernando Vázquez Cárcaba, el gallegu Diego Prieto González y l’asturianu Diego Lobo Tuñón, pesllando’l concursu la gallega Raquel Vilas Otero.

Al mesmu tiempu que se desenvuelve’l Mac Crimmon, el Grupu Baille Tradicional San Félix ye la formación musical qu’abre esti sábado la participación asturiana con un espectáculu amañáu especialmente pal festival y que ye la culminación de los 35 años d’hestori del grupu dende que ñaciera en 1983 en Candás. L’escenariu d’esta primer participación asturiana de 2018 en Lorient va ser l’Espace Marine.

El grupu San Félix va ufrir un espectáculo estremáu en tres partes: una primera con tres bailles y una danza, una segunda con otros tres bailles executaos per muyeres y que fina con una esposición de traxes tradicionles y una tercera parte qu’entama con un baille nel que s’axunta Asturies con Breizh.

El grupu San Félix, anguaño consta de venticinco persones de 12 a 65 años y con una Escuela de danza tradicional que’l so oxetivu ye introducir a los neños y adultos nel baille, el cantar y la cultura tradicional asturiana. A lo llargo de la so llarga carrera, la banda interpretó cantares y temes musicales tradicionales en toa Asturies, según en tol mundu, dende la Península Ibérica a Cuba, al traviés d’Hungría, Italia o inclusive Bretaña.

En 2013, El Grupu Baille Tradicional San Félix presentó l’espectáculu “palabrería” (= palabres) en munches ciudaes d’Asturies, onde la música, la lliteratura, la danza tradicional y l’arte audiovisual coesistíen nel mesmu espaciu escénicu p’amosar tantu’l respetu a la tradición musical, según la innovación y la busca d’un nuevu públicu. L’espectáculu presentáu en Lorient ye una continuación d’aquel trabayu.

La xornada en Lorient ya entamó con participación asturiana a les 10 de la mañana de la mán del gaiteru Jesús Fernández González que dió nel Palaciu de Congresos la Master Class de Gaita xuntu al gallegu Pepe Vaamonde.

Loading Facebook Comments ...