El grupu Gueta na Fonte promociona en Polonia el Camín asturianu a Santiago

by asturnet | julio 8, 2004 11:40 pm

El folk asturianu promociona en Polonia el Camín a Santiago. La banda Gueta na Fonte representará al Principáu el prósimu llunes na inaguración d’una esposición sobro l’itinerariu xacobéu que podrá visitase nel Muséu Etnográficu de Varsovia y que ta entamada en comuña polos Gobiernos autonómicos d’Asturies, Galicia, Castiella y León y La Rioja.

Nel recital, Gueta na Fonte interpretará un repertoriu basáu na música tradicional asturiana, pero con llugar tamién pa les composiciones propies y les pieces populares de países celtes vecinos. Amás de la intervención del grupu folk, formáu hai agora cuatro años, l’actu d’inaguración incluyirá una preba de productos de les comunidaes organizadores de l’amuesa a la qu’Asturies contribúi con quesos del país.

La esposición, que se presenta énte’l públicu baxo’l títulu ‘Sentimientos de Camino’, concéde-y un especial pesu a la imaxe ya incorpora fotografíes del Camín Xacobéu al so pasu per Asturies tomaes por Arnaud Späni.

Source URL: http://asturnews.com/el-grupu-gueta-na-fonte-promociona-en-polonia-el-camin-asturianu-a-santiago/