El grupu de teatru Rosario Trabanco pon n’escena “L’atracu”

Esti martes 16 d’ochobre, el Grupu de Teatru Rosario Trabanco va poner n’escena a les siete la tarde la obra costumista titulada “L’atracu”. Sedrá nel CMI d’El Llano y dientro de l’Amuesa de FETEAS, Federación Asturiana de Grupos de Teatru Amateur d’Asturies. La entrada ye llibre y de baldre.

Escrita por José Ramón Oliva y dirixida por Lisardo Suárez, la trama d’esta hestoria desenvuélvese na sucursal bancaria d’un pueblu asturianu. Dalgunos de los sos vecinos faen los trámites habituales de los primeros díes de mes, cuando, de sópitu, apaez un atracador, tres el consiguiente plasmu y correspondiente polveru, entama a desendolcase entós una aventura que de principiu a fin va provocar un cientu de risaes ente los espectadores.

Elisa Álvarez y Lisardo Suárez fundaron la compañía “Rosario Trabanco”, de Xixón, nel añu 2000. Tamién integraben el grupu orixinal Sara Suárez y Christian Argüelles. Más tarde diríen xuniéndose’l restu d’intérpretes, hasta los dolce que tien anguaño. El principal oxetivu d’esta compañía ye collaborar nel caltenimientu y espardimientu de la cultura asturiana al traviés del teatru costumista.