El Grupu de Participación Xuvenil d’Avilés presenta les sos conclusiones

El Grupu de Participación Xuvenil d’Avilés presenta les sos conclusiones
28 marzu 10:24 2019 Imprimir

El Grupu de Participación Xuvenil d’Avilés vieno acabante presentar les conclusiones del so trabayu sobro depresión y ansiedá en moces. El Centru Municipal de Persones Mayores de Les Meanes foi l’escenariu la presentación col sofitu d’escenes dramatizadas creaes pa la ocasión, por aciu la técnica del Teatru Foru.

El Grupu de Participación Xuvenil d’El Patiu de Mocedá del Conceyu d’Avilés presentó les conclusiones del so trabayu d’investigación sobro la incidencia de la depresión y l’ansiedá na mocedá d’Avilés. L’actu cuntó cola presencia de Raquel Ruiz, concejala de Mocedá, y tuvo llugar esti xuevesa les 18 hores nel Centru Municipal de Persones Mayores de Les Meanes (C/Cuba, 16).

Como complementu a les conclusiones representaron escenes dramatizaes, al traviés de la técnica del Teatru Foru, que dexen esponer toles cuestiones qu’afecten a una comunidá y que sían los sos integrantes quien busquen conjuntamente soluciones cola mediación de los personaxes. L’asistencia a la presentación nel salón d’actos del centru ye llibre, y abierta a toes aquelles persones que se sientan parte del problema y deseyen apurrir les sos propies perspectives y soluciones.

Dende xineru d’anguaño, el Grupu de Participación xuvenil d’El Patiu, conformáu por moces y mozos d’ente 16 y 21 años y col sofitu de Raquel Ruiz, realizó un proyectu d’investigación, desenvueltu por aciu entrevistes a profesionales de la área de salú mental, tanto municipal como rexonal. Ye la culminación d’un trabayu que s’empecipió a empiezos de cursu, coles mires de favorecer una reflexón colectiva en base a la so realidá y la de la redolada que los arrodia.

N’avientu, los integrantes del Grupu formaron parte d’un intercambiu xuvenil internacional nel que desenvolvieron xuna campaña d’incidencia política en redol a una tema que-yos esmolecía: los múltiples casos qu’esisten al so alredor de persones nueves diagnosticaes con trestornos de depresión y/o ansiedá, y qu’alleguen de forma regular a consulta psicolóxica, tanto pública como privada.

El Grupu acompañó la presentación de les conclusiones por aciu representaciones al traviés de la técnica del Teatru Foru, que nació en Brasil de la mano d’Augusto Boal. Les escenes sobro les que trabayaron van inducir al alderique comuñal en redol a les resultancies de la investigación.